Armsport.am-ը գրում է.
«Լիվերպուլի» պաշտպան Դեյան Լովրենն անդրադարձել է շաբաթներ առաջ արած հայտարարությանը: Խորվաթ ֆուտբոլիստը նշել էր, որ ինքն աշխարհի լավագույն պաշտպանների հնգյակում է.
«Այո՛, ես ասել եմ, որ աշխարհի լավագույն պաշտպաններից մեկն եմ, և դա այդպես է: Իհարկե, ինձ չսիրողները հակառակը կասեն, սակայն ես ավելացնելու ոչինչ չունեմ:
Ոչ ոք իդեալական չէ: Մարդիկ միշտ քեզ սխալների վրա են որսում և ուշադրություն չեն դարձնում լավ խաղիդ: Երբեմն մտածում եմ, որ արժանի չեմ նման ատելության:
Նայեք Ռամոսին: Նա ավելի շատ սխալներ է թույլ տալիս, քան ես, սակայն խաղում է «Ռեալում»: Երբեմն իմ բախտը պարզապես չի բերում: Երբ ես սխալներն եմ թույլ տալիս, թիմը պարտվում է, բայց չեմ հանձվում: Առանց սխալների հնարավոր չէ հաջողության հասնել:
Ես չեմ ասել, որ աշխարհի լավագույն պաշտպանն եմ, ասել եմ, որ լավագույնների հնգյակում եմ: Նշեք ևս մեկ ֆուտբոլիստի, ով նախ մասնակցել է Չեմպիոնների լիգայի եզրափակչին, ապա շաբաթներ անց խաղացել է աշխարհի առաջնության եզրափակչում:
Այո՛, իմ թիմերը պարտվել են այդ խաղերում, բայց կարծում եմ, որ ես արժանի եմ գովասանքի»,- ասել է Լովրենը: