Սերկևիլի պտուղները պարունակում են պեկտինային նյութեր, կիտրոնաթթու, բազմապիսի շաքարներ, C վիտամին, միկրոտարրեր: Սերմերում կան լորձային նյութեր, որոնք ուռչում են ջրում, ինչպես նաև օսլա, ճարպեր, սպիտակուցային նյութեր, ներկանյութեր, հանքային նյութեր, գլյուկոզիդ և այլն:
Սերկևիլն օգտագործում են որպես հակաբորբոքային, հակամանրէային, թույլ լուծողական, արյունը վերականգնող, քրտնաբեր միջոց:
Սերկևիլի միջուկի լորձանման նյութերը և սերմերն օգտագործում են հազի, սրտային հիվանդությունների դեպքում, անգամ տուբերկուլյոզի բուժման ժամանակ:
Սերկևիլից պատրաստված թուրմը կարելի է օգտագործել բրոնխիալ ասթմայի, շնչափողաբորբի (տրաքեիտ)՝ շնչափողի լորձաթաղանթի բորբոքման ժամանակ:
10 գրամ տերևների կամ պտղամսի վրա լցնել 300մլ եռման ջուր, թողնել 1-1,5 ժամ և օգտագործել օրական 3-4 անգամ, ուտելուց 30 րոպե առաջ:
Այս թուրմը կարելի է օգտագործել նաև ստամոքսի բորբոքումների ժամանակ:
Սերկևիլի թուրմով բերանի խոռոչը ողողել բերանաբորբի (ստոմատիտ), լնդերի արյունահոսության ժամանակ:
Սերկևիլի թուրմն օգտագործում են նաև աչքերի լվացման համար:
Սերկևիլի փափկամսի կամ հյութի ջերմաթրջոցների ամենօրյա կամ հաճախակի օգտագործումը հետանցքի ճաքերի արագ բուժելու ամենաարդյունավետ միջոցներից է:
Զգուշացում. ցանկացած առողջական խնդրի դեպքում դիմեք բժշկի: Ժողովրդական միջոցների կիրառումը բուժական նպատակներով պետք է վերահսկվի մասնագետի կողմից:
