Հնարավո՞ր է սմբուկը սառեցնել եւ պահել՝ ձմռանն ուտելու համար: Պարզվում է, որ սմբուկը կարելի է սառեցնել, բայց ոչ հում վիճակում, ընդ որում՝ սմբուկը յուրահատուկ համ ունի, որը սխալ սառեցման դեպքում ձմռանն օգտագործելիս կարող է վերածվել տհաճ համի:

Վերցրեք սմբուկը, լվացեք, բարակ ու երկայնական շերտեր կտրատեք ու դրեք թավայի մեջ, համեմեք աղով: Սմբուկը պետք է աղի մեջ թողնել մոտ մեկ ժամ (ավելի նախընտրելի է՝ երկու ժամ): Այս ընթացքում սմբուկից հյութ է դուրս գալիս, որն անպայման պետք է հեռացնել:

Կաթսայի մեջ ջուր լցրեք եւ եռացրեք: Ջրի մեջ սմբուկի հինգից-վեց շերտ լցրեք եւ սպասեք երեք րոպե: Այնուհետեւ կարելի է շերտերը հանել եւ դնել քամիչի մեջ. այս գործընթացն արագացնելու համար կարելի է անգամ սմբուկի շերտերը լվանալ:

Այսպիսով՝ սմբուկի շերտերն արդեն կարելի է սննդի տոպրակների կամ տարաների մեջ լցնել, լավ փաթաթել եւ դնել սառնախցիկի մեջ: Ահա այս մեթոդով կարելի է սմբուկը սառեցնել՝ ձմռանն օգտագործելու համար: Այժմ Դուք արդեն ձմռանն էլ կարող եք սմբուկով աղցաններ կամ ուտեստներ պատրաստել. ընդամենը պետք է հանել սառնախցիկից եւ տապակել:

Ի դեպ, սմբուկը սառնարանում պահելու համար կարելի է ոչ միայն եռացնել, այլեւ տապակել: Երկու տարբերակով էլ կարելի է լավ արդյունքի հասնել:
Կայքում տեղ գտած մտքերն ու տեսակետները հեղինակի սեփականությունն են և կարող են չհամընկնել BlogNews.am-ի խմբագրության տեսակետների հետ:
print Տպել