Նախիջևանի հատվածում գտնվող ադրբեջանական բանակի մասին առավոտյան լուր տարածվեց, որ այդ հատվածում թշնամին ունեցել է 4 զինծառայողի կորուստ: Ժամեր անց պարզ դարձավ, որ, մահացած զինծառայողներից բացի, կա նաև 11 վիրավոր: Ադրբեջանական կողմը փորձում է այդ ամենը ներկայացնել իբրև ՃՏՊ-ի արդյունք:
Հիշեցնենք, որ Նախիջևանի հատվածում ադրբեջանական բանակը սադրիչ գործողությունների էր դիմել հենց Գյուննութ գյուղի հատվածում: Հետագայում այդ շրջանում տեղի ունեցան մի շարք դիրքերի տեղաշարժեր ինչպես թշնամու, այնպես էլ մեր բանակի կողմից: Այդ ամբողջ ընթացքում ադրբեջանական կողմը փորձում էր ներկայացնել իր առավելությունները: Սակայն ամեն բան հունից դուրս եկավ, երբ լցվեց մեր բանակի համբերության բաժակը:
Սադրիչ գործողություններին ի պատասխան՝ հայկական կողմն ավիրեց ադրբեջանական նոր կառուցված դիրքերը, որոնց մի մասն այրվեց ու մոխիր դարձավ: Դրանից հետո ադրբեջանական կողմը հայտնեց զոհերի և վիրավորների մասին:
Ենթադրվում է, որ զոհերը և վիրավորները եղել են հենց այդ այրված դիրքերում ծառայություն իրականացնող զինծառայողները: Մեծ է հավանականությունը, որ ադրբեջանական բանակը մոտ օրերս կրկին «դժբախտ պատահարների» արդյունքում զոհեր կգրանցի, քանի որ իրականում դիրքային ավելի շատ վնասներ են ստացել, քան մենք բացահայտել ենք, և իրենք հայտարարել են:
