«Լեռնային Ղարաբաղի հարցերը չեն կարող մեզ չանհանգստացնել: Դուք գիտեք, որ Ռուսաստանը հանդես է գալիս այդ հակամարտության խաղաղ կարգավորման օգտին... Բոլոր նրանք, ովքեր հանդես են գալիս հարաբերությունների սրման օգտին, բոլոր նրանք, ովքեր չեն լսում ժողովրդի խոսքերն ու ցանկությունը՝ խաղաղ ապրելու մասին, իհարկե, գնում են լարման ճանապարհով: Մենք պետք է ամեն ինչ անենք այդ ճանապարհը կանխելու համար: Ադրբեջանը միշտ ճիշտ և կառուցողական դիրքորոշում է որդեգրել՝ կապված Լեռնային Ղարաբաղի հարցի հետ»,- ըստ «ՌԻԱ Նովոստի» ռուսական գործակալության՝ հայտարարել է Ռուսաստանի Պետդումայի նախագահ Վյաչեսլավ Վոլոդինը Ադրբեջանի խորհրդարանի նախագահ Օկթայ Ասադովի հետ հանդիպման ժամանակ:
Այս հայտարարությունը հերթապահ ու շարքային հայտարարություն չէ՝ հատկապես հաշվի առնելով այն տարածաշրջանային ու ռազմաքաղաքական համատեքստը, որում հնչել է դա:
Իսկ իրավիճակն իսկապես բավական մոտ է պայթյունավտանգին: Ադրբեջանը նորանոր ուժեր է կենտրոնացնում սահմանի նախիջևանյան հատվածում, անցած շաբաթ էականորեն ավելացրել է հրադադարի ռեժիմի խախտման միջադեպերը, և ամենակարևորը՝ անցած շաբաթ ադրբեջանական ուժերը դիմել են դիվերսիոն փորձի, որը, բարեբախտաբար, Լեռնային Ղարաբաղի պաշտպանության բանակի ուժերը կանխել են:
Ահա այս իրադարձությունների ֆոնին ռուս բարձրաստիճան պաշտոնյան հանդես է գալիս իրավիճակի սրումը դատապարտող հայտարարություններով և ոչ ավել-ոչ պակաս՝ ոչ միայն չի դատապարտում Ադրբեջանի ակնհայտ նախապատերազմական քայլերն ու ռազմական հռետորաբանությունը, այլև Ադրբեջանի կեցվածքը որակում է որպես «ճիշտ և կառուցողական»: Սա այլ կերպ, քան Ադրբեջանին պատերազմ սանձազերծելու հարցում տրված ռուսական կանաչ լույս՝ դժվար է որակել:
Պատկերացնել կարելի է, թե ըստ ռուսական իսթեբլիշմենթը՝ Ադրբեջանի ո՞ր գործողությունները կորակվեին սխալ և ապակառուցողական, երբ «ճիշտ ու կառուցողական» են որակվում ակնհայտորեն պատերազմի նախապատրաստվելուն ուղղված գործողությունները, երևի Երևանի գրավումը, ինչպես բազմաթիվ անգամ սպառնացել է Ադրբեջանը:
Շատ կարևոր է այս հայտարարության ոչ միայն ռազմական, այլ նաև քաղաքական համատեքստը: Բանն այն է, որ անցած շաբաթվա ընթացքում մի քանի կարևոր իրադարձություններ տեղի ունեցան Հայաստանի՝ արևմտյան քաղաքականության ուղղությամբ: Հունիսի 21-ին տեղի ունեցավ Հայաստան-Եվրոպական միություն գործընկերության խորհրդի անդրանիկ նիստը, որից հետո ԵՄ-ն պաշտոնական հաղորդագրության ու ԵՄ արտաքին հարցերով հատուկ ներկայացուցիչ Ֆեդերիկա Մոգերինիի մակարդակով իր անվերապահ աջակցությունը հայտնեց Հայաստանի, ինչպես սկսված ներքին բարեփոխումների իրականացմանը, այնպես էլ արտաքին քաղաքական կարևորագույն ուղղություններով, այդ թվում՝ Լեռնային Ղարաբաղի հակամարտության կարգավորման առումով. ԵՄ-ն վերահաստատեց հավատարմությունը ԵԱՀԿ Մինսկի խմբի շրջանակներում լուծելու քաղաքականությանը:
Այս իրադարձությունների ֆոնին հայտնի դարձավ, որ հուլիսի սկզբին ՀՀ վարչապետ Նիկոլ Փաշինյանը պատրաստվում է մեկնել Բրյուսել, որտեղ մի կողմից՝ նախատեսված են նրա բարձր մակարդակի հանդիպումները ԵՄ ղեկավարության հետ, մյուս կողմից՝ Փաշինյանը մասնակցելու է ՆԱՏՕ-ի գագաթնաժողովին: Ահա այս երկու կարևորագույն այցերի մասին տեղեկությունները լրացրեցին արևմտյան ուղղությամբ Հայաստանի համար ստեղծված նպաստավոր միջավայրը»,-գրում է թերթը:
Նյութն ամբողջությամբ կարդացեք թերթի այսօրվա համարում:
Կայքում տեղ գտած մտքերն ու տեսակետները հեղինակի սեփականությունն են և կարող են չհամընկնել BlogNews.am-ի խմբագրության տեսակետների հետ:
print
Տպել