«Երևանում մեկնարկել է «ԱրմՀայԹեք-2018» ռազմաարդյունաբերական միջազգային ցուցահանդեսը, որն անցկացվում է արդեն երկրորդ անգամ, և որում ներկայացվում է, ըստ էության, հայկական ռազմաարդյունաբերության հեռանկարը: Ինչպիսին է այդ հեռանկարը` դեռևս բավական անորոշ է, այն իմաստով, որ շատ բան կախված է Հայաստանի կառավարման արդյունավետությունից:
Առայժմ իրավիճակը հիմնականում հռետորաբանության մակարդակում է, թեև անշուշտ, սա այն ոլորտն է, որտեղ խոսքը միշտ էլ ավելի տեսանելի կլինի, իսկ գործի զգալի մասը պետք է մնա փակ: Այդուհանդերձ, առանցքային ցուցիչը թերևս կլինի այն, թե հայկական տնտեսության մեջ ինչպիսի տեսակարար կշիռ է ձեռք բերելու ռազմաարդյունաբերությունը, որքան աշխատատեղ է ապահովվելու այդ ոլորտի զարգացման շնորհիվ, ինչպիսի կլաստերներ են ձևավորվելու: Ըստ այդմ` հնարավոր կլինի լիարժեք գնահատել, թե ինչպիսի դինամիկայով է զարգանում ռազմաարդյունաբերությունը:
Առայժմ պետք է դրական գնահատել նպատակադրումը, որ անում է իշխանությունը` ռազմաարդյունաբերության զարգացման շնորհիվ բանակը հանրության և պետության համար ծախսային բեռից վերածել տնտեսության լոկոմոտիվի: Մնում է վերածել, իսկ այստեղ, անշուշտ, խնդիրները թե կառավարման արդյունավետության դաշտում են, թե նաև միջազգային քաղաքականության, քանի որ հայկական ռազմաարդյունաբերությունը, այսպես ասած, ինքն իրենով գործնականում անկարող կլինի ճեղքել միջազգային ռազմաարդյունաբերական ցանցը և դառնալ մասնակից, դա հնարավոր է անել խոշոր գործընկերային նախագծերի միջոցով: Իսկ առանց դրա՝ զուտ ներքին սպառման համար ռազմաարդյունաբերության զարգացումը չի կարող ունենալ հեռանկար: Անշուշտ, այդ ամենն իշխանությունը գիտակցում է, խնդիրն այն է, թե որքան են լինելու իրավիճակն առաջ մղելու կամքն ու կարողությունը, քանի որ այստեղ պահանջվելու է թե հմուտ մենեջմենթ, թե նաև բազմաշնորհ դիվանագիտություն»,-գրում է թերթը:
Նյութն ամբողջությամբ կարդացեք թերթի այսօրվա համարում:
