Այս մասին տեղեկացնում է Երևանի քաղաքապետարանի տեղեկատվության և հասարակայնության հետ կապերի վարչությունը։
«Հանս Քրիստիան Կոֆոեդ» հիմնադրամում հրավիրված խորհրդակցության ժամանակ Ռուզաննա Զաքարյանը Երևանի վարչական շրջանների սոցիալական բաժինների պետերի և անօթևանների ժամանակավոր կացարանի տնօրինության հետ քննարկել է 2017 թվականի ցուցանիշները, ինչպես նաև վերջին օրերին ոստիկանության հետ կատարած գիշերային շրջայցերի արդյունքները: Խորհրդակցության ժամանակ քաղաքապետարանի աշխատակազմի սոցիալական վարչության պետը պատասխանատուներին հանձնարարել է ամենօրյա հետևողականությամբ շրջայցեր իրականացնել մայրաքաղաքի հանրային վայրերում, որտեղ կարող են հայտնվել կամ գիշերել անօթևան անձինք՝ նրանց համապատասխան սոցիալական օգնություն ցուցաբերելու նպատակով:
Նշենք, որ Երևանի քաղաքապետարանի և «Հանս Քրիստիան Կոֆոեդ» հիմնադրամի համագործակցությամբ «Անօթևան մարդկանց համար ժամանակավոր օթևանի տրամադրման ծառայություններ» ծրագիրն իրականացվում է դեռ 2011 թվականից: Միայն 2017 թվականի տվյալներով ժամանակավոր կացարան են տեղափոխվել 124 անօթևաններ, որոնց թվում՝ ազատազրկման վայրերից ազատ արձակված, ինչպես նաև հաշմանդամություն ունեցող անձինք:
Կացարանում կատարված աշխատանքների արդյունքում վերականգնվել են 24 անօթևանների սոցիալական կապերը, 27-ը վերադարձել են ինքնուրույն կյանքի, 17 անօթևաններ տեղափոխվել են խնամքի մասնագիտացված կենտրոններ և տուն-ինտերնատներ, իսկ 8 անօթևաններ տեղավորվել են աշխատանքի:
Կայքում տեղ գտած մտքերն ու տեսակետները հեղինակի սեփականությունն են և կարող են չհամընկնել BlogNews.am-ի խմբագրության տեսակետների հետ:
print
Տպել
