ՀՀ Օրհներգի հնչյունների ներքո մեկնարկեց 6-րդ գումարման Ազգային Ժողովի 2-րդ նստաշրջանը: Գրանցվել էր 91 պատգամավոր , ԱԺ նախագահ Արա Բաբլոյանը հայտարարեց՝ քվորում կա և նիստը մեկնարկեց:
Քաղաքական ուժերը ներկայացնող պատգամավորները նստաշրջանի մեկնարկին ընդառաջ հանդես են եկել օրենսդրական նախաձեռնություններով: Առաջիկա քառօրյային ԱԺ-ում քննարկվելու են մի շարք նախագծեր և համաձայնագրեր:
Նիստի օրակարգը հաստատվեց և ԱԺ-ն իր աշխատանքներն սկսեց ՀՀ և Մոլդովայի քաղաքացիների առանց մուտքի այցելությունները վավերացնելու մասին նախագծի քննարկմամբ:
Օրակարգում են նաև մի շարք նախագծեր, ինչպես օրինակ՝ հարկադիր կատարողի գործողությունների կամ անգործության հետևանքով պատճառված վնասի փոխհատուցումը կատարվի հարկադիր կատարման ծառայության նյութական խրախուսման և համակարգի զարգացման ֆոնդի հաշվին:
Առաջարկվում է ներդնել հարևանային իրավունքի ներդրումը ՀՀ քաղաքացիական օրենսգրքում, որը կարգավորելու է հարևանային հարաբերությունների բնագավառում առկա բազմաթիվ վեճեր, խախտումներ և անորոշ իրավիճակներ: Նախագծով հստակեցվել է հարևան հողամասի վրա ընկած ծառերի կամ թփերի պտուղների նկատմամբ սեփականության հարցը, հարևան տարածքից արմատների և ճյուղերի անցումը այլ հողամաս, սահմանվել են կարգավորումներ ջրօգտագործման կանոնների, հարևան հողամասերի վիճելի սահմանների և սահմանակից կառույցների ընդհանուր օգտագործման վերաբերյալ և այլն:
Օրակարգում է նաև «Ճարտարապետական գործունեության մասին» օրենքը: Ամենակարևորը, թերևս, այս դրույթն է. ճարտարապետը պարտավոր է չկատարել կառուցապատողի (պատվիրատուի) նախագծային առաջադրանքի պահանջները, եթե դրանք հակասում են Հայաստանի Հանրապետության օրենսդրության, նորմատիվ-տեխնիկական փաստաթղթերի, տարածական պլանավորման փաստաթղթերի կամ նախագծման թույլտվության պահանջներին կամ ելակետային տվյալներին.
Առաջարկվում է նաև, որ մի շարք կազմակերպություններ ու ընկերություններ (ցանկը կորոշի կառավարությունը) 3 տարով ազատվեն ԱԱՀ-ից:
Քննարկվելու է նաև «Հեռուստատեսության եւ ռադիոյի մասին» օրենքում փոփոխություններ կատարելը՝ մրցույթների չկայացման դեպքերի վերաբերյալ:
