Սեփական երկրի քաղաքացիների հանդեպ ավելի անտարբեր ու անպատասխանատու վերաբերմունք հնարավոր չի պատկերացնել: Մի քանի օր առաջ էր Նաիրիտ գործարանի տարածքում պայթյունը, երբ մեր ԱԻՆ-ի և Առողջապահության նախարարության շատ գրագետ աշխատակիցները՝ մեկը մյուսին հերթ չտալով հայտարարեցին, որ ծուխն ԱՆՎՏԱՆԳ է և քաղաքացիներին վտանգ չի սպառնում:

Եվ ահա ԱՆՎՏԱՆԳ ծխից ընդամենը 2-3 օր անց Նաիրիտին մոտ գտնվող բնակելի տարածքների բնակիչները թունավորված են: Նշաններն են՝ ջերմություն, թուլություն, ցածր զարկերակային ճնշում ու սրտխառնոց:

Շտապօգնություն ենք կանչում, գալիս են, չգիտեն ի՞նչ անեն, ի՞նչ հիվանդության նշաններ են, չափում են սրտի աշխատանքը, ճնշումը ու բոլորին նույն նշանակումն են անում՝ ռեգիդրոն:

Իսկ ռեգիդրոնը, եթե գիտեք,նշանակում են ՏՈՔՍԻԿՈԻՆՖԵԿՑԻԱՆԵՐԻ ժամանակ, որպեսզի ջրազրկում չառաջանա: Այսինքն բժիշկներն արդեն գիտեն, որ այդ տարածքում մարդկանց մոտ համատարած թունավորում է:

Մեր տուն եկած բժիշկն ասաց, որ այս տարածքում վերջին երկու օրերի ընթացքում կրկնակի ավելացել են շտապօգնության կանչերը, ու բոլորը նույն նշաններով:

Դե հիմա հարգելի պատասխանատու մարմիններ, ասեք տեսնենք այդ անվտանգ ծխից ինչպես այսպես եղավ, թե՞ այնքան համարձակություն չունեք, որ խոստովանեք ձեր սխալը: Գոնե հիմա հայտարարությամբ հանդես եկեք, որ մարդիկ չվախենան, իմանան ինչ անեն:
Կայքում տեղ գտած մտքերն ու տեսակետները հեղինակի սեփականությունն են և կարող են չհամընկնել BlogNews.am-ի խմբագրության տեսակետների հետ:
print Տպել