Այսօր լրագրող Սյուզան Սիմոնյանը մի ծավալուն հրապարակում է արել, որտեղ, ի թիվս այլևայլ մտահանգումների, նշել է նաև, թե ոստիկանության պետը հայտարարել է, որ «մաքրել է դաշտը հոգեկան հիվանդություն ունեցողներից»։ Չի ուշացել նաև լրագրողուհու դատավճիռը, թե «քաղաքակիրթ երկրում նման հայտարարությունից հետո բարձրաստիճան պաշտոնյան ստիպված կլիներ հրաժարական գրել կամ առնվազն դատարանում հոգեկան հիվանդություններ ունեցող ու հաշվառման մեջ գտնվող անձանցից կոլեկտիվ դատական հայց կստանար։ Մեզանում նման պաշտոնյաները կարող են հանգիստ ապրել։ Նույնիսկ երկրպագուներ են վաստակում»։
Իրականում ոստիկանության պետը խոսել է ցուցակները մաքրելու՝ ճշգրտելու մասին։ Կարծում եմ՝ տարբերությունն էական եւ ակնհայտ է։
Այնպես որ, քաղաքակիրթ երկրում ինչպե՞ս պիտի վարվի լրագրողը, որը նենգափոխում է ուղիղ խոսքը կամ զլանում է դիտել համացանցում առկա տեսագրությունը և ընթերցողին ինքնահնար «մեջբերումներ» է մատուցում։ Քաղաքակիրթ երկրում լրագրողը այդքանից հետո առնվազն հրապարակավ ներողություն կխնդրեր և կընդուներ սեփական թերացումը։ Մենք քաղաքակիրթ երկիր ենք։ Սպասենք քաղաքակիրթ արձագանքի։
Կայքում տեղ գտած մտքերն ու տեսակետները հեղինակի սեփականությունն են և կարող են չհամընկնել BlogNews.am-ի խմբագրության տեսակետների հետ:
print Տպել