Քննարկվել են Հայաստանի և Լիտվայի միջև ապակենտրոնացված համագործակցության հեռանկարներ Yerkir.am-ը գրում է.
 Փետրվարի 10-ին Լիտվայում ՀՀ դեսպան Տիգրան Մկրտչյանն այցելեց Լիտվայի Մաժեյկյուի շրջան, որտեղ հանդիպում ունեցավ Մաժեյկյուի քաղաքապետ Անտանաս Տենիսի հետ։
 Հանդիպման ընթացքում քննարկվեցին Հայաստանի և Լիտվայի միջև ապակենտրոնացված համագործակցության հեռանկարները, փորձի փոխանակման հնարավորությունը՝ տնտեսության զարգացման, զբոսաշրջության աճի ապահովման, առևտրային և մշակութային կապերի հաստատման, ծառայությունների մատուցման և այլ բնագավառներում։  Դեսպան Մկրտչյանը նշեց, որ հետամուտ է լինելու, որպեսզի մոտ ապագայում Հայաստանի շրջաններից մեկի և Մաժեյկյուի միջև համագործակցություն հաստատվի։

Զրուցակիցները կարևորեցին գործարար ոլորտի ներկայացուցիչների ներգրավվածությունը քաղաքապետերի և մարզպետերի հնարավոր փոխայցելությունների շրջանակներում։ Հանդիպմանը մասնակցեց նաև Լիտվայի Սեյմասի (խորհրդարան) «Օրենք և արդարություն կուսակցության» և Սեյմասում հայ-լիտվական բարեկամական խմբի անդամ, Մաժեյկյուի շրջանը ներկայացնող պատգամավոր Կեշտուտիս Բարտկյավիչյուսը։ Տեղեկանք։ Մաժեյկյուն գտնվում է Լիտվայի հյուսիս-արևմտյան հատվածում։

Բնակչությամբ՝ 8-րդ քաղաքն է, շուրջ 57 հազար բնակչությամբ։ Մաժեյկյուի տնտեսության կարևորագույն ոլորտներից են սննդարդյունաբերությունը, մետալուրգիան, փայտագործությունը։
Կայքում տեղ գտած մտքերն ու տեսակետները հեղինակի սեփականությունն են և կարող են չհամընկնել BlogNews.am-ի խմբագրության տեսակետների հետ:
print Տպել