Aysor.am-ը գրում է.
Իրանի գերագույն դատարանը հաստատել է մահապատիժը, որին մինչ այդ դատապարտվել էր հանրահայտ գործարար Բաբաք Զանջանին, որը մինչեւ վերջերս համարվում էր երկրի ամենահարուստ մարդը։ Այս մասին ISNA գործակալությանը հայտնել է դատարանի նախագահի տեղակալ Գոլյամ Ռեզա Անսարին, փոխանցում է ТАСС-ը։
Նրա խոսքով նավթային գործարքների իրականացման ժամանակ խաբեությունների գործով մահապատժի դատապարտված մյուս երկու մեղադրյալների գործը կրկնակի քննության է ուղարկվել։
Sorinet Group կորպորացիայի սեփականատեր Բաբաք Զանջանիի կարողությունը գնահատվում էր 15 մլրդ դոլար։ 2013-ի վերջին միլիարդատիրոջը կալանավորել էին, իսկ 2016-ի մարտին դատարանը նրան մահապատժի էր դատապարտել։
Գործարարին մեղադրում են խաբեությունների մեջ, որոնց հետեւանքով պետությունը մոտ 3 մլրդ դոլարի չափով վնաս է կրել։ Քննության տվյալներով Թեհրանի դեմ միջազգային պատժամիջոցների ժամանակաշրջանում Զանջանին, որը կատարում էր Իրանի Նավթի նախարարության թրեյդերի դերը, յուրացրել է խոշոր գումարներ, որոնք պետք է փոխանցվեին Իրանի ազգային նավթային ընկերության հաշվեհամարներին։
2012-ին ԱՄՆ-ն ու ԵՄ երկրները Զանջանիին ընդգրկել էին «սեւ ցուցակում», որտեղ այն գործարարներն էին, որոնք շրջանցում էին իրանական նավթի առեւտուրը ու իրանական բանկային ոլորտը սահմանափակող պատժամիջոցները։