Վերջերս շատ է խոսվում ՀՀ-ում տեղի ունեցող փոփոխությունների և դրանց ազդեցության մասին: Իհարկե, որոշ դեպքերում փոփոխությունների արդյունքները տեսանելի կլնեն միայն որոշ ժամանակ անց, բայց, օրինակ, գազի գնի վերանայումը շատ արագ կնկատվի հանրության կողմից, քանի որ այս փոփոխությունը թեթևացնում է հատկապես անապահով խավի հոգսերի մի մասը:
Չնայած նրան, որ ՀՀ-ում էներգետիկայի մասին օրենքը թույլատրում է վերանայել սակագները գործողության մեջ մտնելուց առնվազն վեց ամիս հետո, ՀԾԿՀ-ն արդեն սկսել է Գազպրոմի ներկայացրած սակագնային հայտի ուսումնասիրությունը։ Հանձնաժողովը նպատակ ունի ավարտել ուսումնասիրությունը հնարավորինս սեղմ ժամկետում, որպեսզի նոր սակագները գործողության մեջ մտնեն հաջորդ տարվա հունվարի 1-ից։
Մեծ կարևորություն տալով անապահով խավի սոցիալակն բեռի թեթևացմանը՝ նշենք, որ գազի գնի նվազումը մեծ խթան է նաև ջերմոցային տնտեսության և վերամշակող կազամակերպությունների գործունեության համար։ Այն կնպաստի ինչպես արտադրության ծավալների ավելացմանը, այնպես էլ արտադրանքի մրցունակության բարձրացմանը։ Ցավոք, տնտեսական ոչ բարվոք պայմանների և գազի թանկ լինելու պատճառով վերջին տարիներին բազմաթիվ փոքր ջերմոցային տնտեսություններ ստիպված էին ձմռան ամիսներին դադարեցնել իրենց գործունեությունը։ Սա լավ հնարավորություն կլինի այդ պրակտիկայից հրաժարվելու համար։ Առհասարակ սակագների իջեցումը դրական ազդեցություն կունենա նաև տնտեսության այլ ոլորտներում արտադրության ինքնարժեքի նվազեցման, մրցունակության բարելավման վրա։
