Առողջապահության ոլորտը հեշտերից չէ, ու առաջին իսկ օրերից պետք է արմատական փոփոխություններ մտցնել այստեղ, ոչ թե մեյմունություն անել լրագրողների մոտ, հետո լրիվ այլ բան հայտարարել:
Մի երկու բան, որ խորհուրդ կտայի զբաղվել նախարարին՝ յուր 8 խորհրդականների, 4 տեղակալների և 2 օգնականների հետ համատեղ.
1. Զբաղվել դեղերի շուկայով և մաքրել այն կավիճից ու տարատեսակ թույներից, որոնք դեղի անվան տակ ու բարձր գներով վաճառվում են հանրությանը (չխնայել անգամ Լֆիկին):
2. Հիմքից թափ տալ պոլիկլինիկա կոչվածը: Վերանայել տեղի բժիշկների պրոֆեսիոնալիզմն ու ոչ պրոֆեսիոնալ կադրերին ուղարկել հանգստի (չվաստակած): Պոլիկլինիկայի բժիշկներն աշխատում են օրական 3 ժամ, որից 40 րոպեն ուշացած են բարեհաճում ժամանել: Դե իսկ պրոֆեսիոնալիզմի մասին թերևս չխոսեմ. ծայրահեղությունից ծայրահեղություն են: Լավ հմտացած են սուրճ խմելու և քաղցրավենիք ուտելու մեջ: Կոնկրետ 11 պոլիկլինիկայի բուժանձնակազմի թերևս 30%-ը սրտացավ ու գրագետ լինի:
3. Հետևողական լինել մահվան բոլոր դեպքերին: Անձամբ հետևել կամ յուր 14 օգնականախորհրդականների միջոցով նպաստել, որպեսզի հիվանդի մահվան մեղավոր բժշկին ցմահ զրկեն բժշկությամբ զբաղվելու լիցենզիայից: Նման դեպքերում չեն ասում «դե մարդա, սխալվելա, ու՞մ հետ չի պատահում»: Այս ոլորտում ՉՊԵՏՔ Է սխալվեն: Քրեական գործի հարուցմամբ կզբաղվեն Ձեր ասած դատարանները, Դուք սկզբի համար արգելեք նմաններին հիվանդանոց ոտք դնել:
4. Էթիկայի ու նրբանկատության դասեր անցկացրեք «Շտապ օգնության» բժիշկների հետ: Ծայրահեղ կիրթ ու պրոֆեսիոնալ բժշիկներ շատ կան, բայց, ցավոք, քիչ չեն նաև աննրբանկատներն ու կոշկակարները:
5. Հետևողական եղեք նույն «Շտապ օգնության» բժիշկ-բուժքույրերի աշխատանքային օրենսգրքով սահմանված նորմերի պահպանմանը: Պայմանագիր են կնքում 13-14 այց կատարելու, բայց կատարում են 23-24 այց: Ֆիզիկական հոգնածությունից զատ դա ԱՕ-ի նորմերի կոպիտ խախտում է:
6. Հիվանդանոցների սպասարկող բուժանձնակազմի ջեբկիրի ու մուրացկանի հոգեբանության մասին թերևս բոլորը գիտեն: Սկսած ընդունարանից, վերջացրած բաժնի վարիչներով՝ նայում են գրպանիդ: Չհաշված հիվանդին տարվող ուտելիքները, որոնք բաժանմունք մտնելուն պես հօդս են ցնդում սանիտարների թեթև ձեռքով:
Սրանք թերևս այն հիմնական խնդիրներին էին, որոնք ես՝ ոլորտի մեջ չգնվող քաղաքացիս, նկատել ու առնչվել եմ:
Այսքանը գրեցի, պարո՛ն նախարար, որպեսզի գործ ունենաք զբաղվելու, ոչ թե խաղ ու պարի վերածեք ոլորտի կառավարումը: Սա ԱՊՊԱ-յի ոլորտը չէ, այստեղ մարդկային կորուստը դրամական փոխհատուցման ենթակա չէ, այստեղ ամեն ինչ մարդուն է լինում, ոչ թե ժեշտին: Կարեն Կարապետյանի ձևավորած կառավարության հետ շատերն են հույսեր կապում. ցավոք, Դուք դեռ այդ ցուցակում չեք: Ապացուցեք, որ սխալվում եմ:
Նյութի աղբյուր՝ https://www.facebook.com/aram1307/posts/1635738226725049
Կայքում տեղ գտած մտքերն ու տեսակետները հեղինակի սեփականությունն են և կարող են չհամընկնել BlogNews.am-ի խմբագրության տեսակետների հետ:
print
Տպել