Araratnews.am-ը գրում է.
WikiLeaks-ի նոր հրապարակումը մերկացնում է Քլինթոնին քաղաքական խաբեության մեջ և հարվածում նրա նախընտրական քարոզարշավին ինչպես 9 բալանոց երկրաշարժ` հայտարարել է ամերիկացի դատախազ Դեյվիդ Ուոլլը Fox News հեռուստաալիքի եթերում:
WikiLeaks-ի կայքէջը հրապարակել է ԱՄՆ-ի նախագահի թեկնածու Հիլարի Քլինթոնի նախընտրական քարոզարշավի նախագահ Ջոն Պոդեստայի գաղտնի նամակները, որտեղ նաև մեջբերումներ կան 2013-2014-ին Քլինթոնի վճարովի, մասնավոր ելույթներից:
Ուոլլը, որ նաև Թրամփի կողմնակիցն է, հայտարարել է, որ հրապարակման մեջ ամենաքննադատական հանգամանքը բանկերի ներկայացուցիչների առաջ Քլինթոնի ելույթից մեջբերումն է, որում նա բառացիորեն ասել է, որ ինքն ունի երկու քաղաքականություն` հանրային, ինչի մասին ինքը խոսում է մարդկանց հետ, և մասնավոր, որը «միանգամայն այլ է»:
«Սա կհարվածի նրան ինչպես 9 բալանոց երկրաշարժ: Սա նրան ի ցույց է դնում որպես լրիվ խաբեբայի: Նրա խոսքորը նշանակում են` նախընտրական քարոզարշավի ժամանակ ես կանեմ ամեն ինչ ընտրվելու համար և կասեմ նրանց այն ամենը, ինչ նրանք ցանկանում են լսել, սակայն ճշմարտությունը գաղտնի կմնա»,- ասել է Ուոլլը, նշելով, որ բոլոր հրապարակված նյութերը պետք է ուշադիր ուսումնասիրվեն:
WikiLeaks-ը Պոդեստայի նամակագրության ավելի քան 50 հազար էլեկտրոնային նամակներից հրապարակել է 2050-ը: Նամակների մի մասը նվիրված է Թուրքիային և սիրիական հակամարտությունում նրա շահերին, ինչպես նաև «Իսլամական պետություն» ահաբեկչական խմբավորման դեմ պայքարում նրա դերակատարմանը:
