Iravunk.com-ը գրում է.
Ինչպես ասում է իմաստուն ժողովուրդը` երեխաներն ընտանիքի հայելին են, իսկ երբ մեծանում են, դառնում են ընտանիքի պատիվը կամ պատուհասը: Հատկապես հայ իրականության մեջ, սա առավել ընդգծված է, քանի որ հաճախ են մամուլի ուշադրության կենտրոնում հայտնվում այս կամ այն չինովնիկի որդիները: Ընդորում` հիմնականում ոչ դրական ֆոնի ներքո: Թե ինչ սպասել նորանշանակ պաշտոնյաների` նախարարների որդիներից,«Իրավունքը» որոշակի մանրամասներ է պարզել:
ԶՈՒՅԳԵՐԻ ՀԱՅՐ ՆԱԽԱՐԱՐԸ
ՀՀ գյուղատնտեսության նորանշանակ նախարար ԻԳՆԱՏԻ ԱՌԱՔԵԼՅԱՆԸ երեք որդիների հայր է: Ուշագրավ է այն, որ նրա որդիներից երկուսը զույգ են` ԲՈՐԻՍ եւ ԱԼԵՔՍԱՆԴՐ Առաքելյանները: 18-ամյա տղաները դեռ բանակ չեն գնացել, սակայն հասցրել են լավ կրթություն ստանալ եւ լինել Եվրոպայում: Իսկ ավագ որդին`ԷԴՈՒԱՐԴ ԱՌԱՔԵԼՅԱՆԸ 21 տարեկան է:
ԱՐՎԵՍՏԱԳԵՏԻ ՀԱՅՐ ՆԱԽԱՐԱՐԸ
ՀՀ առողջապահության նորանշանակ նախարար ԼԵՎՈՆ ԱԼԹՈՒՆՅԱՆՆ ունի մեկ զավակ, որին էլ տվել հոր անունը` ՆՈՐԱՅՐ ԱԼԹՈՒՆՅԱՆ: Իր հարցազրույցներից մեկում Լ. Ալթունյանը նշել է, որ երջանիկ մարդ է, քանի որ ունի կատարյալ կին եւ կատարյալ որդի: Ի դեպ, կրտսեր Ալթունյանը սովորել է Եվրոպայում: Նա զբաղվում է դասական երաժշտությամբ: Նախարար հայրիկը մի առիթով նույնիսկ անկեղծացել է, որ իր որդին շատ ավելի կարդացած է, քան ինքը:
ԶԻՆՎՈՐԻ ՀԱՅՐ ՆԱԽԱՐԱՐԸ
ՀՀ էկոնոմիկայի նախկին եւ ՀՀ բնապահպանության նորանշանակ նախարար ԱՐԾՎԻԿ ՄԻՆԱՍՅԱՆՆ ունի մեկ դուստր եւ երկու ուստր: Երեխաների անունների ընտրության հարցում Ա. Մինասյանն ու նրա կինը`Աստղիկը, հավասար բաժանում են կատարել: Նրանց ավագ դուստրը` ԱԻԴԱ ՄԻՆԱՍՅԱՆԸ, կրում է Ա. Մինասյանի մոր անունը, իսկ մեծ որդին` ՍԵՅՐԱՆ ՄԻՆԱՍՅԱՆԸ, կրում է մորական պապի անունը: Մինասյան ընտանիքի փոքր որդին` ԳԱՐԻԿ ՄԻՆԱՍՅԱՆՆ է: Զավակների հարցում, իսկապես, հպարտանալու տեղ ունի Ա. Մինասյանը, քանի որ որդին` 18-ամյա Սեյրանը, ծառայում է Հայոց բանակում:
ՓՈՔՐԻԿ ՀՐԱՇՔՆԵՐԻ ՀԱՅՐ ՆԱԽԱՐԱՐԸ
ՀՀ ֆինանսների նորանշանակ նախարար ՎԱՐԴԱՆ ԱՐԱՄՅԱՆՆ ունի երկու երեխա` աղջիկ ու տղա: Դուստրն այս տարի գնաց առաջին դասարան, իսկ որդին` դեռ նախադպրոցական տարիքի է: Ֆիննախարարի երեխաների մասին, միայն կարելի է ասել, որ, իսկապես հրաշք են: Այնպես որ, դեռ շատ տարիներ հետո նրանք կսկսեն հաշվել նախարար հայրիկի գրպանի եւ պետբյուջեի գումարները:
ՃԱՆԱՉՎԱԾ ԵՐԵԽԱՆԵՐԻ ՀԱՅՐ ՆԱԽԱՐԱՐԸ
ՀՀ մշակույթի նորանշանակ նախարար ԱՐՄԵՆ ԱՄԻՐՅԱՆԻ երեխաների մասին, հանրությունը վաղուց է քաջատեղյակ: Նա ունի երեք զավակ` ՍԵԴԱ եւ ԱՐԻՆԱ Ամիրյաններն ու ՀԱՅԿ ԱՄԻՐՅԱՆԸ, ով դեռ մանուկ տարիքից հեռուստաէկրաններին էր, իսկ այսօր արդեն աշխատում է ԱՄՆ-ում: Ամիրյանների երեխաների համար հայրկիկ պաշտոնը որքան էլ անակնկալ էր, նույնքան էլ բնական, քանի որ մշտապես Արմեն Ամիրյանը բարձր պաշտոններ է զբաղեցրել ու եղել սիրված ժողովրդի կողմից:
ՀՀ էներգետիկայի եւ բնական պաշարների նորանշանակ նախարար ԱՇՈՏ ՄԱՆՈՒԿՅԱՆԸ երեխաների հարցում բավական հետ է մնացել գործընկերներից: Նա ամուսնացած չէ: Այս դեպքում կարելի է հիշել արտասահմանյան մի ասացվածք, որն, իհարկե, խիստ վիճելի է` «Չկան երեխաներ, չկան խնդիրներ»:
