Tert.am–ը գրում է.
Աշխարհի ամենահարուստ մարդկանցից մեկը` ԱՄՆ-ի նախագահական մրցապայքարի մասնակից Դոնալդ Թրամփը, ով հայտնի է ցոփ ու շվայտ կյանքի հանդեպ մեծ սիրով, իրեն շքեղությամբ է շրջապատել նույնիսկ օդում։
Ինչպես նշում է The Business Insider-ը, ասվածի ապացույցն է նրա անձնական օդանավը` 100 մլն դոլար արժողությամբ Boeing 757-200–ը: Էքսցենտրիկ միլիարդատերն այն ձեռք է բերել 2011թ. ու ձևափոխել է ըստ իր նախասիրությունների:
Ինքնաթիռը համալրված է Rolls-Royce RB211 հզոր շարժիչներով, ինչի շնորհիվ այն աշխարհում ամենաարագընթաց ինքնաթիռներից մեկն է համարվում:
Ի սկզբանե ինքնաթիռը նախատեսված է եղել 239 ուղևորի համար, սակայն Թրամփի ցանկությամբ սրահը ձևափոխվել է ու նստատեղեղի թիվը կրճատվել է` հասնելով 43-ի:
Միլիարդատիրոջ «երկաթե թռչունը» համալրված է բոլոր հարմարություններով, որպեսզի Թրամփը գեթ մի ակնթարթ շքեղության պակաս չզգա: Մետաքսե ասեղնագործ սպիտակեղենով հարմարավետ մահճակալ, մուլտիմեդիա ժամանցային համակարգ, 24 կարատանոց ոսկով պատված լվացարան, ոսկեպատ ամրակներով կաշվե նստատեղեր, 2 ննջասենյակ, հյուրասենյակ. ահա այն ամենը, ինչ կարելի է տեսնել Թրամփի օդանավում:
Այս շքեղ փոխադրամիջոցի մասին առավել մանրամասն պատկերացում կազմելու համար աղբյուրն առաջարկում է դիտել ստորև ներկայացված տեսանյութը.
