Tert.am-ը գրում է.
Գազի և էլեկտրաէներգիայի սակագների իջեցումն էական ազդեցություն է ունենալու ցեմենտի և ապակու ինքնարժեքի վրա, մեքենաշինության ոլորտում գնի լուրջ փոփոխություններ չեն սպասվում. այս մասին այսօր «Մեդիա կենտրոնում» քննարկման ժամանակ ասաց Հայրենական ապրանք արտադրողների միության նախագահ Վազգեն Սաֆարյանը:
Նա նշեց, որ գնի իջեցումը տեղական արտադրողների մոտ, այնուամենայնիվ, դրական արձագանք է ստացել:
«Տեղական արտադրողների վերաբերմունքը գազի գնի իջեցման վերաբերյալ դրական է, հատկապես այն արտադրողների, որոնց գործունեությունը կախված է գազի և էլեկտրաէներգիայի օգտագործման հետ, օրինակ՝ ապակու, շշերի պատրաստման հետ է կապված»,- ասաց նա և նշեց, որ օրինակ՝ ցեմենտի ինքնարժեքը կիջնի 4-5 տոկոսով:
Ըստ Վազգեն Սաֆարյանի՝ սակագների իջեցումների միտումը պետք է շարունակական լինի, ՀԷՑ-ն ու «Գազպրոմ Արմենիան» պետք է օպտիմալացման ծրագրեր իրականացնեն, որպեսզի այն էական ազդեցություն ունենա տնտեսության զարգացման վրա:
Ըստ նրա՝ պետք է նաև մեծացնել գազի ծավալը. «Մի կողմից պետք է գազի գինը իջեցվի, որպեսզի բնակչությունը կարողանա ավելի շատ գազ օգտագործել, այդ դեպքում նրանց շահույթը կմեծանա, որովհետև գազի ծավալների իրացումը կմեծանա: Մյուս կողմից մենք պետք է քայլեր կատարենք, որ մեր գազի գինը դառնա այնպիսին, ինչպիսին Ռուսաստանում է՝ մոտ 130 դոլարի սահմանում, որովհետև, եթե մենք ԵԱՏՄ-ի անդամ ենք և այնտեղ ծառայությունների, մարդկային ուժի, կապիտալի տեղաշարժը պետք է ազատ լինի, այս դեպքում ապրանքների մրցունակության խնդիր կա: Մենք պետք է այնպիսի էներգակիրների սակագներ ունենանք մեզ մոտ, ինչպիսին Ռուսաստանում է, Բելառուսում և այլն, այլապես այդ չորս ազատությունների սկզբունքը չի կարող գործել, և դա կդառնա ոչ արդիական»։
Վազգեն Սաֆարյանն ավելացրեց նաև, որ այս գործընթացներին զուգահեռ պետք է ձգտենք նաև իրանական կողմից շատ գազ ստանալ:
