Yerkir.am-ը գրում է.
Այսօր ֆինանսավարկային ու բյուջետային հարցերի մշտական հանձնաժողովի նիստում քննարկվում էր Ազգային ժողովի հինգերորդ գումարման իններորդ նստաշրջանի` 2016 թվականի հունիսի 6 - 9-ի չորսօրյա նիստերի օրակարգի նախագծում 2015թ. պետական բյուջեի կատարման հաշվետվությունը ներառելու մասին հարցը:
Հիմնական զեկուցող` գլխավոր գանձապետ Ատոմ Ջանջուղազյանին հարց ուղղեց ԱԺ ՀՀԿ խմբակցության պատգամավոր Խոսրով Հարությունյանը: Նա մատնանշեց, զեկույցի համաձայն, ապրանքաշրջանառության ու սպառման նվազման ցուցանիշները` հետաքրքրվելով, թե այդ ցուցանիշների պարագայում ինչպես է հնարավոր եղել տնտեսական աճ արձանագրել: Պատգամավորը նշեց, որ մանրածախ ապրանքաշրջանառության ծավալների նվազումը ցույց է տալիս, որ քաղաքացիները սկսել են քիչ սպառել՝ նախընտրելով շատ խնայել:
Ատոմ Ջանջուղազյանը նշեց, որ տնտեսական աճը գրանցվել է հիմնականում արդյունաբերության, մասնավորապես` հանքարդյունաբերության աճով, երբ սկսեց շահագործվել Թեղուտի հանքավայրը: Նա համաձայնեց այն կարծիքի հետ, որ քաղաքացիները, հավանաբար, նախընտրում են խնայել, քան սպառել:
