Հյուսիսային Կորեայի արտգործնախարարությունը հայտարարել է, որ Փխենյանը կիրագործի միջուկային զենքի չտարածման իր պարտավորությունները, սակայն միջուկային զենքից հրաժարվել չի պատրաստվում՝ փոխանցում է Interfax-ը։
Հայտարարությունում նշվում է նաև, որ երկիրն ակտիվ ջանքեր կներդնի ողջ աշխարհի միջուկային զինաթափման նպատակով։
ԱԳՆ-ն այդ կերպ է մեկնաբանել Ճապոնիայում անցակցված G7-ի վերջին գագաթնաժողովի ժամանակ ԱՄՆ նախագահ Բարաք Օբամայի կողմից արված վերջին հայտարարությունը։ Նա ասել էր, որ Հյուսիսային Կորեան ոչ միայն միջուկային զենք է մշակում, այլ տարածում է այն, ինչպես նաև հանդիսանում ամենամեծ խոչընդոտն աշխարհի միջուկային զինաթափման ճանապարհի վրա։
«ԱՄՆ-ն, շարունակելով իր թշնամական քաղաքականությունը Հյուսիսային Կորեայի հանդեպ միջուկային մահակով ահաբեկման ուղիով, երազում է միջուկային զենքից մեր հրաժարվելու մասին։ Թող նրանք ավելի լավ է ճտի սպասեն խաշած ձվից»,- հայտարարել են հյուսիսկորեական գերատեսչությունում։
Ավելի վաղ ԱՄՆ նախագահ Բարաք Օբաման հայտարարել էր, որ Հյուսիսային Կորեայի միջուկային հավակնությունները լուրջ սպառնալիք են ներկայացնում միջնաժամկետ հեռանկարում։