Tert.am-ը գրում է.
Եթե Ֆրանսիայի մայրաքաղաքում մարդիկ աշխատում են շաբաթական 30 ժամ և 50 րոպե, ապա Հայաստանում առնվազն 50 ժամ` մասնավոր հատվածում։ Tert.am-ի հետ զրույցում հայտնեց ԱԺ սոցիալական հարցերի մշտական հանձնաժողովի անդամ Լյուդմիլա Սարգսյանը` մանրամասնելով. «Եթե բյուջետային հիմնարկներում աշխատում են օրական 8 ժամ` 5-օրյա աշխատանքային ռեժիմով, ապա մասնավոր հատվածում` աշխատում են ոչ թե 8, այլ 10 ժամ, եթե անհրաժեշտ է` 11-12 ժամ: Եվ հետևաբար, աշխատանքային ժամերի սահմանը բարդ է որոշել, բայց ես կարծում եմ, որ մեր երկրում օրենքով պաշտպանված չլինելով, մասնավոր սեկտորում աշխատում են 50 և ավելի ժամ»:
Նշենք, որ ըստ շվեյցարական խոշորագույն UBS բանկի աշխատակիցների 70 քաղաքներում անցկացված հետազոտության` ամենակարճ աշխատանքային շաբաթը Փարիզում է. Ֆրանսիայի մայրաքաղաքում շաբաթական 30 ժամ և 50 րոպե են աշխատում, իսկ ամենաերկար աշխատանքային շաբաթը Հոնգկոնգում է՝ ավելի քան 50 ժամ:
Մյուս կողմից՝ Լյուդմիլա Սարգսյանն ասում է, որ այնքան էլ ճիշտ չէ համեմատել Հայաստանի ու Փարիզի աշխատաժամերի քանակը, որովհետև կյանքի բոլորովին այլ տեմպ ու որակ է. «Ֆրանսիան զարգացած, կայացած իրավական երկիր է և հավանաբար, իրենք կարող են իրենց թույլ տալ աշխատել 30 ժամ: Նաև այն պատճառով, որ ամեն մի աշխատող այնտեղ պաշտպանված է և կարողանում է իր աշխատանքի ժամերի իրավունքը պաշտպանել: Մեր դեպքում, մասամբ` բյուջետային հիմնարկներում»:
Որպես ամենաերկար աշխատաժամ ունեցող մասնագիտություն պատգամավորը նշեց վարորդներին` ասելով. «Ես հաճախ եմ տաքսի նստում, և շատ դեպքերում, հենց տաքսիստներից եմ լսում, որ 12-13 ժամ մինիմալ աշխատում են, և գիշերային ժամերին ուղղակի ի վիճակի չեն լինում քշել: Պատկերացնո՞ւմ եք ինչ վտանգավոր իրավիճակ է»:
Հիշեցնենք, որ Երևանի քաղաքապետարանի ենթակայության տակ գտնվող ուղևորափոխադրող 75 ընկերություններից 5-ում կատարած ուսումնասիրությունների արդյունքներն արձանագրել էին աշխատանքային օրենսդրության բազմաթիվ խախտումներ, որոնք վերաբերում են աշխատանքային ժամերին ու հանգստին: Ըստ այդմ՝ վարորդներ աշխատում են 16-17 ժամ:Ըստ Լյուդմիլա Սարգսյանի լրացման` «շաբաթ-կիրակին ոչ մի կերպ պաշտպանված չէ»։
Պատգամավորը կարծում է, որ մարդը չգիտի ում դիմի իր իրավունքները պաշտպանելու համար, իսկ դիմելու դեպքում էլ վստահ է, որ իրեն ասելու են`«ձեռ չի տալիս, ազատվիր, գնա »:
