Araratnews.am-ը գրում է.
Սանդրո Բոտիչելլիի «Հրեշտակի գլուխը» կտավը հինգշաբթի Նյու Յորքի Sothebyʼs-ի աճուրդում վաճառվել է 1,09 մլն դոլարով: Փորձագետների կարծիքով, կտավը էսքիզ է «Աստվածամայրը մանկան հետ, Հովհաննես Մկրտիչը եւ հրեշտակը» նկարի համար, որը ստեղծվել է Բոտիչելլիի արվեստանոցում եւ պահվում է Լոնդոնի Ազգային պատկերասրահում:
«Քրիստոսի մկրտությունը»` վարպետի եւս մեկ նկար, ձեռք է բերվել 466 հազար դոլարով, հայտնում է ՏԱՍՍ-ը: Կտավը վերջին կես դարի ընթացքում պահվել է մասնավոր հավաքածուում եւ հայտնի է միայն սեւ-սպիտակ լուսանկարներով:
Ամենահետաքրքիր նմուշներից մեկը դարձել է «Աստվածամայրը նորածնի հետ» կտավը, որը ստեղծվել է սիենյան դպրոցի վարպետներ Քրիստոփորո դե Բենդոչչիոյի եւ Մեո դի Պերոյի կողմից մոտավորապես 1380 թվականին: Այս ստեղծագործությունը երկմասանի կտավի մաս է կազմում, դրա երկրորդ մասը կորած է համարվում:
Ընդհանուր առմամբ հին վարպետների աշխատանքների վաճառքից ստացված գումարը կազմել է 4,8 մլն դոլար:
