Tert.am-ը գրում է.
Գերմանիայի Քրիստոնյա-Դեմոկրատական Միություն կուսակցության ղեկավարության հրավերով դեկտեմբերի 14-ից 15-ը ՀՀ կրթության և գիտության նախարար, Հայաստանի Հանրապետական կուսակցության փոխնախագահ Արմեն Աշոտյանը աշխատանքային այցով գտնվում էր Գերմանիայում` ՔԴՄ տարեկան համաժողովի աշխատանքներին մասնակցելու նպատակով:
 
Այս մասին հայտնում են ՀՀ արտաքին գործերի նախարարության լրատվական ծառայությունից։
 
Կարլսռուհեում տեղի ունեցած համաժողովին մասնակցելուց բացի նախարար Աշոտյանը դեկտեմբերի 14-ին աշխատանքային հանդիպումներ է ունեցել ԳԴՀ Բունդեսթագի ՔԴՄ/ՔՍՄ դաշինքի խմբակցության փոխնախագահ Ֆրանց-Յոզեֆ Յունգի և Բունդեսթագի պատգամավոր Քրիստոֆ Բերգների հետ:

Հանդիպումների ընթացքում քննարկվել են ՔԴՄ և ՀՀԿ միջև համագործակցության հեռանկարները, խորհրդարանականների միջև շփումների ակտիվացման և երկկողմ փոխայցելություններ իրականացնելու հնարավորությունները: Անդրադարձ է եղել նաև Բունդեսթագում Հայոց ցեղասպանության ճանաչման բանաձևի ընդունման գործընթացին:
 
Դեկտեմբերի 15-ին նախարար Աշոտյանին և Գերմանիայում ՀՀ դեսպան Աշոտ Սմբատյանին ընդունել է Բադեն-Վյուրթեմբերգ երկրամասի լուսավորության, երիտասարդության և սպորտի հարցերով նախարար Անդրեաս Շտոխը:
 
Հանդիպմանը հանգամանալից քննարկվել են Հայաստանի և Բադեն-Վյուրթեմբերգ երկրամասի միջև դպրոցական կրթության ոլորտում համագործակցության հեռանկարները, ինչպես նաև` միջնակարգ մասնագիտական կրթական համակարգում փորձի փոխանակման հնարավորությունը, ձեռք են բերվել հետագա քայլերի վերաբերյալ պայմանավորվածություններ:
 
Մտքեր են փոխանակվել Հայաստանում գերմանական դպրոց հիմնելու ծրագրի շուրջ:
Կայքում տեղ գտած մտքերն ու տեսակետները հեղինակի սեփականությունն են և կարող են չհամընկնել BlogNews.am-ի խմբագրության տեսակետների հետ:
print Տպել