Երբ Բոբբի Ուեսսոնը անցած շաբաթ նայում էր իր քնած կնոջը, նա պատկերացնել անգամ չէր կարող, որ իր զգացմունքային գրառումը կվերածվի «վիրուսի» և կտարածվի ողջ համացանցով մեկ։ Բայց հենց այդպես էլ պատահեց։
Բուժքրոջ աշխատանքը շատ հաճախ չեն գնահատում բժշկության մեջ։ Չէ՞ որ նրանք վիրահատություններ չեն անում, այլ ուղղակի կողքից օգում են, տանում–բերում։ Բայց չէ՞ որ նրանց ցուցաբերած առաջին օգնությունից, օպերատիվ արձագանքից է կախված` մարդը կհասնի՞ վիրահատարան, թե՞ ոչ։
Ռայենա Ուեսսոնը բուժքույր է աշխատում Ալաբամայի հիվանդանոցի վնասվածքաբանության բաժանմունքում։ Հենց աշխատանքի գնալուց առաջ էլ նա պառկել էր հանգստանալու, երբ ամուսինը որոշեց կիսվել այս պատմությամբ։ Այն համացանցում 600 հազարից ավել հավանության արժանացավ, և ավելի քան 150 հազար մարդ կիսվեց դրանով։
«Իմ կինը որոշեց մի փոքր ննջել։ Մեկ ժամից նա կարթնանա, մի քանի ձևական շտկումներ կանի դիմահարդարման մեջ և վերջ. նա պատրաստ է աշխատանքի մեկնելուն։
Աշխատանքային գործիքներն ու հանդերձանքը վայրկյանների ընթացքում կհավաքվի և կդրվի աչքի առաջ, դիմահարդարումն ու սանրվածքը նույնպես շատ արագ կարվեն։ Նա կդժգոհի, որ սարսափելի տեսք ունի։ Ես, իհարկե, չեմ համաձայնվի նրա հետ և սուրճ կառաջարկեմ։
Այնուհետև նա կնստի բազմոցին և կփորձի խմել այն՝ զուգահեռաբար խաղալով մեր փոքրիկի հետ, ով այդ ընթացքում անձայն նրան մոտեցած կլինի։
Հետո նրա հայացքը կթափառի սենյակի հեռուներում։ Նա մտածում է, ես զգում եմ։
Նա համբուրում է երեխային, հետո ինձ և գնում հոգ տանելու այն մարդկանց մասին, որոնց մոտ ամենաանհաջող օրն է ստացվել։ Ավտովթարներ, հրազենային վնասվածքներ, պայթյուններ, այրվածքներ. պրոֆեսիոնալներ, ձախորդներ, աղքատներ, միլիոնատերեր, քահանաներ, թմրամոլներ, մարմնավաճառ մայրեր, հայրեր, որդիներ, դուստրեր և նույնիսկ ամբողջ ընտանիքներ։ Կապ չունի, թե ով եք Դուք, և ինչ է Ձեզ հետ պատահել։ Նա հոգ կտանի յուրաքանչյուրիդ մասին։
