PanARMENIAN.Net-ը գրում է.
Բրյուսելում ոստիկանության հատուկ գործողության անցկացման վայրում հզորպայթյուն է որոտացել: Այն լսելի է եղել ոստիկանության արգելապատնեշից այն կողմ, որտեղ լրագրողներն են եղել, հայտնում է ՏԱՍՍ-ը: Արգելափակված գոտու շառավիղը կազմել է մոտ 300 մ:
Ոստիկանական ուժերը գնացել են դեպի թաղամասի խորքը, տանիքներին նկատելի են դիպուկահարները:
Ավելի վաղ հայտնի դարձավ, որ ոստիկանությունը հատուկ գործողություն է անցկացնում Բրյուսելի Մոլենբեկ համայնքում: Գործողության ժամանակ բերման է ենթարկվել Փարիզում նոյեմբերի 13-ի ահաբակչությունների ենթադրյալ մասնակից Սլահ Աբդեսլամը, որը բնակվում է այդ համայնքում: Ձերբակալության ժամանակ ոստիկաններն ձայնային նռնակներ են կիրառել: Հայտնի է, որ զոհեր և տուժածներ չկան:
Ֆրանսիայի մայրաքաղաք Փարիզում նոյեմբերի 13-ի երեկոյան 7 ահաբեկչական հարձակում է իրականացվել։ Ըստ վերջին տվյալների, «Բատակլան» թատրոնում, «Ստադ դե Ֆրանս» ստադիոնի մոտակայքում ու Փարիզի ևս 5 այլ կետում միաժամանակյա հարձակումների ընթացքում զոհվել է 129 մարդ, վիրավորվել 200-ից ավելին։ Ֆրանսիայի նախագահի հրամանով երկրում ատրակարգ դրություն է հայտարարված: Ֆրանսիայի նախագահ Ֆրանսուա Օլանդը հայտարարել է, որ Փարիզում ահաբեկչությունների համար պատասխանատու է «Իսլամական պետությունը», հայտնել է Reuters-ը: ԻՊ-ն իր հերթին նոր ահաբեկչություններով է սպառնում Ֆրանսիային:
Միևնույն ժամանակ Բելգիայի դաշնային ոստիկանությունը խնդրել է ԶԼՄ-ներին ձեռնպահ մնալ հակաահաբեկչական գործողության ընթացքում ուժային գործողությունների լուսանկարների հրապարակումից: «Դաշնային ոստիկանությունը դիմում է մամուլին` հորդորելով չհրապարակել ոստիկանության գործողությունների լուսանկարներ, ելնելով մարտավարական նկատառումներից և հանուն բնակչության անվտանգության»,-ասել է Բելգիայի դաշնայիյ ոստիկանության մամուլի քարտուղար Պետեր դե Վաելեն:
Գործողության մանրամասները նա չի մեկնաբանել:
Ավելի վաղ Իրաքի ԱԳՆ ղեկավար Իբրահիմ ալ Ջաֆարին հայտարարել էր, որ «Իսլամական պետություն» խմբավորումը ահաբեկչական գործողություններ է ծրագրել մի շարք երկրներում, այդ թվում ՄՄՆ-ում, Ֆրանսիայում և Իրանում:
«Ռազմական հետախուզության աղբյուրները տեղեկություններ են ստացել, որ «Իսլամական պետության» կողմնակիցներն ահաբեկչական գործողություններ են պլանավորել մի շարք երկրներում, այդ թվում ԱՄՆ-ում, Ֆրանսիայում և Իրանում: «Իրաքի հետախուզության աղբյուրները տեղեկություններ են ստացել այն մասին, որ մի շարք երկրներում, այդ թվում ԱՄՆ-ում, Ֆրանսիայում և Իրանում ահաբեկչական գործողություններ են պատրաստվում, նրանք բոլորը զգուշացվել են»,-ասել է վարչապետը: Նա նշել է նաև, որ ԻՊ-ն սպառնալիք է բոլոր երկրների համար և Իրաքը զգուշացրել էր, որ այն կարող է տարածել իր գործողությունները նաև այլ պետությունների վրա: «Այն, ինչ կատարվեց Եգիպտոսում, Իրաքում, Լիբանանում ու Ֆրանսիայում, հաստատում է այն փաստը, որ ԻՊ-ն համաշխարհային սպառնալիք է»,-ասել է նա:
Մինչդեռ, ըստ BFMTV հեռուստաալիքի, բացահայտվել է Փարիզում թատրոնի գրոհի 4-րդ մահապարտ ահաբեկչի ինքնությունը:
Ըստ հեռուստաալիքի, ահաբեկչի անունն է Սամի, նրա ընտանիքը բնակվում է Փարիզի Սեն Սեն Դենի դեպարտամենտի Բոբինյի քաղաքում` Փարիզի արվարձանում:
Ավելի վաղ պարզվել էր նաև ահաբեկչական գործողության անմիջական մասնակից 3 ահաբեկչի ինքնությունը: Մահապարտներից մեկը, որը գործի էր դրել պայթուցիը «Ստադ դե Ֆրանս» ստադիոնի մոտ, Ֆրանսիայի 20-ամյա քաղաքացի Բիլյալ Հադֆին է: Մյուսը` 31-ամյա Իբրահիմ Աբդեսալոմը գործի է դրել «մահապարտի բաճկոնը» Փարիզի Վոլրտերի փողոցում: Իսկ Իսմաիլ Օմար Մոստեֆան, որի ինքնությունը հաստատվել է մատնահետքով, առնվազն 3-հոգանոց ահաբեկչական խմբի անդամ էր, որոնք ներխուժել էին «Բատակլան» համերգասրահ և սպանել էին 90 մարդու: Շենքի գրոհի ժամանակ նա պայթեցրել է ինքն իրեն, հայտնում է ՌԻԱ Նովոստին:
Բացի այդ, ավելի վաղ Figaro-ն հայտնել էր ևս մեկ հանցագործի անունը` Աբդուլբակ Բ. Մանրամասներ նրա մասին դեռևս չեն հաղորդվում: Ասվել էր նաև, որ Սիրիայի քաղաքացի Ահմեդ Ալմոհամմեդի անունով անձնագիրը հայտնաբերվել է մարզադաշտի մոտ գրոհայինների դիերի հարևանությամբ: Ավելի ուշ հաղորդագրություն հայտնվեց, որ նա Արևմտյան Եվրոպա էր հասել Հունաստանով և Սերբիայով: Իչպես նշում է RTL ռադիոկայանը, Ֆրանսիայի և ԱՄՆ մասնագետները կասկածներ ունեն անձնագրի իսկության վերաբերյալ: Ահաբեկչական գործողություններին մեղսակցության կասկածանքով որոնվում է Ադեսլամ Սալահը: Որպես ահաբեկչությունների պատվիրատու ֆրանսիական ԶԼՄ-ները նշում են 27-ամյա Աբդելհամիդ Աբաուդի անունը Բելգիայից:
