ՀԱՐՑ
Ի՞նչ հետևանքներ և բարդություններ կարող է ունենալ ԱԲՈՐՏԸ:
Հարցին պատասխանում է Գրիգոր Նարեկացի բժշկական կենտրոնի գինեկոլոգիական բաժանմունքի մանկաբարձ-գինեկոլոգ Արամ Սարգսյանը։
Հղիության առաջին իսկ կասկածի դեպքում (դաշտանի ուշացում) դիմե՛ք գինեկոլոգին, մի՛ հետաձգեք, թանկ է յուրաքանչյուր օրը։ Երբեք մի մտածեք ինքնուրույնաբար ազատվել հղիությունից։ Մինչ որոշում կայացնելը մեկ անգամ ևս ծանրութեթև արեք։ Խորհրդակցե՛ք բժշկի հետ, թե հղիության ընդհատման որ եղանակն է առավել անվտանգ։ Ընդհատելով հղիությունը՝ դուք ռիսկի եք ենթարկում Ձեր առողջությունը, ապագա մայրությունը և Ձեր կանացի երջանկությունը։ Յուրաքանչյուր կրկնակի վիրահատություն բազմակի անգամ մեծացնում է այդ ռիսկը։ Աբորտից հետո բարդությունները լինում են երկու տեսակի` վաղ և ուշ։ Վաղ բարդություններն առաջանում են աբորտի ժամանակ կամ անմիջապես հետո։ Դրանք են`
- Արգանդի պատերի ամբողջականության խախտում (պերֆորացիա` թափածակում) և պատռվածք, որոնք բերում են խոշոր անոթների վնասման, միզապարկի և աղիների վնասվածքի, պերիտոնիտի, արյունահոսության
-Արգանդի պարանոցի վնասվածք, որն արտահայտվում է դրա հետագա անբավարարությամբ, ինչն էլ իր հերթին բերում է հղիության կրելախախտի
- Արյան մակարդունակության խաթարում
- Պտղաձվի մնացորդների կասեցում արգանդի խոռոչում` հետագա արյունահոսությամբ, վարակահարությամբ, որի պատճառով կատարվում է արգանդի խոռոչի կրկնաբար քերում
- Սեռական օրգանների քրոնիկ բորբոքային հիվանդությունների սրացում
Ուշ բարդություններն են՝
- Սեռական օրգանների բորբոքային հիվանդություններ
- Հորմոնային խանգարումներ
- Էնդոմետրիոզ
- Չբերություն
- Հաջորդ հղիության ընթացքի բարդություն (ուշաժամկետ վիժում, արտարգանդային հղիություն)
- Հաջորդ հղիությունների և ծննդաբերությունների ընթացքի բարդություններ (մեծանում է մեռելածնության և նորածինների հիվանդությունների հաճախությունը)
- Ավելանում է ֆոնային և չարորակ հիվանդությունների (կրծքագեղձերի, արգանդի լորձաթաղանթի և պարանոցի) վտանգը
Որպեսզի աբորտից հետո առավելագույնս նվազեցնել բարդությունների առաջացման ռիսկը, անհրաժեշտ է հետևել մարմնի ջերմաստիճանին, սեռական ուղիներից արտադրության բնույթին և քանակությանը, աղիների և միզապարկի ժամանակին դատարկմանը, ընդհանուր ինքնազգացողությանը։ Ինչի մասին պետք է հիշել աբորտից հետո. բարձր է բարդությունների առաջացման հավանականությունը, որոնցից շատերը կարող են դրսևորվել մի քանի տարի անց։ Կանանց մեծամասնության մոտ բեղմնավորման ունակությունը վերականգնվում է աբորտից 11-14 օր անց, որը կարող է բերել նոր հղիության։ Ինչպես խուսափել կրկնակի աբորտի վտանգից:
Հոգ տարեք հակաբեղմնավորման մասին անմիջապես աբորտից հետո։ Խորհրդակցեք Ձեր գինեկոլոգի հետ, որպեսզի նա ընտրի Ձեզ համար առավել անվտանգ և արդյունավետ բեղմնականխման մեթոդը։
Ձեր հարցերը գինեկոլոգին կարող եք ուղարկել editor@blognews. am հասցեով կամ BlogNews-ի ֆեյսբուքյան էջին գրելով:
«Գինեկոլոգին հարց ու պատասխան» բաժնի մյուս նյութերին կարող եք ծանոթանալ այստեղ: