Աշխարհում շատ ճանաչված քաղաքներ կան, բայց ամեն քաղաք չէ, որ այնքան երգեր ունի իրեն նվիրված ինչքան որ Երևանը։ Երևանին պարզապես երգերը սազում են, ու անգամ Ջազը, որ սևերի կողմից ստեղծված երաժշտություն է, դարձել է Երևանինը ու մի կախարդական հնչողություն է ստանում մեր վարդագույն մայրաքաղաքում։
Yerevan Jazz Fest 2015-ը այն քիչ երևանյան համերգներից էր, որի ամբողջ ընթացքում շարժվում է նստարանդ, որովհետև ամբողջ շարքը երաժշտույան ռիթմի հետ ոտքը կամաց գետնին է խփում։
Սեպտեմբերի 17-ին՝ առաջին օրը ջազ փառատոնի բացումը արեցին Հայաստանի հեռուստատեսության և ռադիոյի պետական էստրադային-սիմֆոնիկ նվագախումբը (գեղ. ղեկավար՝ Երվանդ Երզնկյան), Արցախի ջազ նվագախումբը (գեղ. ղեկավար՝ Տիգրան Լալայան), Նինո Կատամաձեն իր «Insight» խմբով (Վրաստան), Լորեն Ռոբինը (Ֆրանսիա), Աբրահամ Գումրոյանը (ԱՄՆ), Սերգեյ Մանուկյանը (Ռուսաստան), Արթուր Սաթյանը (Լիբանան), Լևոն Մալխասյանը, Վահագն Հայրապետյանը, Արմեն Թութունջյանն ու Կարեն Մամիկոնյանը:
Սեպտեմբերի 18-ին Մարզահամերգային համալիրում տեղի ունեցավ ԱՄՆ-ից ժամանած Ռիչարդ Բոնա բենդի համերգը: Բենդի կազմում հանդես եկան Ռիչարդ Բոնան, Էթյեն Ստեդվիկը, Լյուդվիգ Աֆոնսոն, Լի Գրինբլատն ու Ադամ Սթոլերը:
Սեպտեմբերի 19-ին երեկոն բացեցին Հայաստանի պետական ջազ նվագախումբը (գեղ. ղեկավար՝ Արմեն Հյուսնունց), ինչպես նաև կատարումներով հանդես եկան Մարիամ և Արմեն Մերաբովները (Ռուսաստան), Էռնա Յուզբաշյանը և Հյուբերտ Թաբսը (Ավստրիա):
