«Ես դիետա եմ պահում». ամեն անգամ ասում էի, որոշում էի, տրամադրվում, չէի ուտում, բայց դա տևում էր ընդամենը մի քանի օր, իսկ գլխավոր պատճառն այն էր, որ չունեի կամքի ուժ, և երբ տեսնում էի իմ սիրելի շոկոլադը, մոռանում էի ամեն ինչի մասին: Գիտեմ՝ ծանոթ իրավիրճակ է, բայց ամեն ինչ փոխվեց, երբ ծանոթացա մի քանի աղջիկների հետ, ովքեր մարզված էին և ունեին մարմնի գեղեցիկ կառուցվածք, կարող եմ ասել՝ հենց նրանք էլ դարձան իմ մոտիվացիան:
Ի դեպ, ես Աննան եմ, ով մեկ ամիս առաջ կշռում էր 83.5 կգ, իսկ հիմա արդեն՝ 79 կգ: Ես պարզապես որոշել եմ հասնել իմ մարմնի ցանկալի կառուցվածքին, իսկ դա ինձ համար 65 կգ-ն է, չնայած հասակս 1.68 մ է: Այսպես, որոշել եմ իմ սեփական փորձով կիսվել, թե ինչպես է ինձ հաջողվում նիհարել, կպատմեմ իմ սննդակարգի, ինչպես նաև բոլոր դժվարությունների մասին, որոնց հանդիպում եմ այս ընթացքում. գուցե ընթերցողներից մեկն էլ կոգևորվի և այս ճանապարհը կորոշի անցնել ինձ հետ:
Սկզբում ուզում եմ գրել մի քանի կետերի մասին, որոնք ինձ համար կարևոր են, և որոնք ես համարում եմ ճիշտ.
- Յուրաքանչյուր մարդ, ով որոշում է ազատվել ավելորդ կիլոգրամներից, նախ պետք է իր համար նպատակ դնի, քանի որ երբ ունենում ես նպատակ, ամեն ինչ անում ես դրան հասնելու համար:
- Մի հավատացեք այն ամենին, ինչ գրում են ինտերնետում, իբր կարող եք մեկ շաբաթում կորցնել հինգ կիլոգրամ քաշ, մի հավատացեք այն ֆիթնես-դիետաներին, որ հաճախ հանդիպում ենք համացանցում։
- Սոված մնալով՝ արդյունքի չեք հասնի: Միևնույն է, հենց սկսեք ուտել, նախատեսվածից ավելի շատ եք ուտելու։
- Դեղեր մի խմեք, դրանք միանշանակ բացասաբար են ազդելու Ձեր օրգանիզմի վրա, որքան էլ որ այդ պահին օգնեն։
- Նիհարեք դանդաղ, արագ նիհարելու դեպքում կորցրած կիլոգրամները կարող եք նույնքան արագ վերականգնել:
- Մի մոռացեք ջրի մասին, աշխատեք օրվա ընթացքում գոնե 1լ ջուր խմել։
- Առողջ սննդակարգը և մարզասրահ հաճախելը հաջողության հասնելու լավագույն միջոցներն են:
- Եթե սկսնակ եք, գոնե առաջին մեկ ամիսն անհրաժեշտ է մարզվել միայն մարզչի խորհուրդով և անել միայն այն վարժությունները, որոնք նա կասի:
- Աշխատեք դիմանալ առաջին շաբաթը, իսկ հետո ավելի հեշտ կլինի։
- Յուրաքանչյուր առավոտ կշռվեք։
- Աշխատեք Ձեր սնունդը սիրով պատրաստել և գեղեցիկ զարդարել Ձեր ափսեի մեջ։
Հիմա հերթը սննդակարգինն է, իհարկե, ոչ ոքի համար նորություն չեմ ասի, եթե ասեմ, որ պետք է ուտել ավելի շատ սպիտակուցներ, գրեթե ամեն ինչ պետք է ուտել խաշած վիճակում, առանց աղի, քիչ չափաբաժնով և կարևորը՝ կոնկրետ գրաֆիկով: Ես արթնանում եմ առավոտյան ժամը վեցին, խմում եմ մեկ բաժակ ջուր, իսկ կես ժամ հետո նախաճաշում:
Նախաճաշ
1 հատ ձու (կարող է լինել նաև խաշած)
4 կտոր տապակած սմբուկ
10:00-ին, երբ ես հասնում եմ աշխատավայր, պարտադիր ուտում եմ մեկ հատ կանաչ խնձոր, իսկ սեղանիս միշտ ջուր եմ դնում, որ անընդհատ խմեմ:
13:00
50 գրամ հնդկաձավար
Կես չափաբաժին բրոկոլիով ձվաձեղ
Մեկ գդալի չափով վարունգ-լոլիկով աղցան
18:00
Այն օրերին, երբ ես պետք է մարզասրահ գնամ, ես ուտում եմ ավելի շատ չափաբաժնով սնունդ, դա ինձ օգնում է ուժ հավաքել և ավելի լավ մարզվել, քանի որ, միևնույն է, այդ կալորիաները կորցնում եմ մարզասրահում:
50 գրամ բրինձ
Մեկ փոքր կտոր խաշած տավարի միս
Մի քանի հատ տապակած դդմիկ
Ես շարունակում եմ նիհարել և ամեն անգամ ոգևորվում են այն մարդկանց խոսքերից, ովքեր իմ կազմվածքում տարբերություն են տեսնում, անգամ ուրախանում եմ, երբ աշխատանքի վայրում հարցնում են՝ այս անգամ ի՞նչ ես ուտելու: Հիմա ինձ սկսել է շատ ավելի դուր գալ իմ ապրելակերպը, և հավատո՞ւմ եք՝ ամեն անգամ անհամբերությամբ եմ սպասում, թե երբ է գալու մարզասրահ հաճախելու օրը: Դուք էլ կիսվեք ձեր կորցրած կալորիաներով, իսկ թե հարցեր կունենաք, մեկնաբանությունների բաժինը հենց դրա համար է:
