Araratnews.am-ը գրում է.
Այս արտահայտությունը ոչ միայն աչքերում անհանգստության մասին է վկայում, այլև հուշում է հնարավոր լուրջ հիվանդության մասին:
Այդ զգացումը ծանոթ է մարդկանց մեծամասնությանը, այսինքն, գեթ մեկ անգամ շատերը նման զգացում ունենում են: Ու վերջին տասնամյակում նման բողոքների թիվն ավելացել է: Բայց, եթե նախկինում նման գանգատներն ասես միայն տարեցներին էր հատուկ` կապված տարիքի հետ արցունքի քանակի նվազման հետ, ապա հիմա նաև շատ երիտասարդներ են գանգատվում աչքերի չորությունից, ավազի զգացումից:
Պատճառները
Բացի տարիքային փոփոխություններից, չոր աչքի ախտանշանը համակարգչի առջև բազում ժամեր անցկացնելուց հետո շատերին է անհանգստացնում: Դրա պատճառով առավոտյան աչքերը բացելն ու նույնիսկ կոպերը շարժելը դժվարությամբ է հաջողվում ու անգամ ակտիվ թարթելուց էլ թեթևություն չի առաջանում: Իսկ երեկոյան թվում է, թե այդ ավազն ավելի է շատացել ու հետն էլ քոր է առաջանում: Բոլոր ախտանշանները կապված են աչքը խոնավացնող հեղուկի անբավարար քանակով: Նորմայում պետք է մեկ օրում 1մլ հեղուկ արտադրվի, իսկ շրջակա անբարենպաստ գործոնները նվազեցնում են առանց այդ էլ չնչին քանակը:
Անպարենպաստ գործոններ են համարվում`
-արևի պայծառ լույսը
-շոգ եղանակը
-ուժգին քամին
-քլորացված ջուրը
-օդորակիչներով շրջանառվող օդը:
Աչքերում չորության զգացում կարող է առաջանալ նաև
- դիաբետի, Շեգրենի, Պարկինսոնի հիվանդությունների ու հորմոնալ խանգարումների դեպքում,
-դեղորայքից կամ էլ կոնտակտային ոսպնյակներից ալերգիաների ժամանակ,
-նյարդային խանգարումներով պայմանավորված թերի քնի դեպքում,
-սուր ավիտամինոզի պարագայում:
Աչքերում չորության տհաճ զգացումը գրեթե բոլորը միանման են նկարագրում` «ասես ավազ լինի աչքերումս, որը խանգարում է նայել»: Սակայն միայն բժիշկը կարող է այդ երևույթի իսկական պատճառները բացահայտել ու որոշել, թե արդյոք դա լուրջ հիվանդության, թե ժամանակավոր, տեսողական հոգնածության հետևանք է:
Ներկայում աչքի լորձաթաղանթի խոնավությունը վերականգնող շատ միջոցներ կան, դրանք մեղմացնում են այդ տհաճ երևույթները ու կարելի է ամեն օր կիրառել:
Սակայն դրանք պետք է իմացությամբ ընտրել: Կան առանց դեղատոմսի վաճառվող կաթիլներ, ու ցանկացողը կարող է նման խնդրի դեպքում գնել ու ինքնուրույն կիրառել: Սակայն, տեսողությունը գանձ է, որը չի կարելի ոչ մի դեպքում անմիտ կերպով վտանգել: Ուստի, մի ծուլացեք, գնացեք ակնաբույժի մոտ ու նա կնշանակի հենց այդ դեպքին հարմար ու անվտանգ միջոց:
Պահպանեք տեսողությունը: Առողջ եղեք: