Շվեյցարացի սուզորդը Բրազիլիայում, իր կյանքը վտանգելով, սուզվել է Ամազոնի հատակը, որպեսզի լողա հսկայական անակոնդաների հետ։ Նրան հաջողվել է բացառիկ կադրեր լուսանկարել անակոնդաների բնական միջավայրից։
Ճանապարհորդը բրազիլական Մատո Գրոսսո դօ Սուլ նահանգում անցկացված 10 օրվա ընթացքում կարողացել է նկարահանել աշխարհի ամենամեծ օձի 6 տեսակ։
Հսկայական գիշատիչները բավականին հանգիստ էին պահում իրենց՝ ուշադրություն չդարձնելով չափից ավելի համարձակություն դրսևորած այս մարդուն։
«Ամեն ինչ կարող էր պատահել։ Չեմ կարծում, որ նա կուտեր ինձ։ Բարեբախտաբար, նա արդեն հասցրել էր կուլ տար իր հերթական զոհին և ինձ չէր դիտարկում` որպես երկրորդ ուտեստ։ Ես այնքան էի նրան մոտեցել, որ կարող էի նույնիսկ դիպչել, եթե ցանկանայի իհարկե»,- պատմել է 53-ամյա այս լուսանկարիչը։
Անակոնդան գրեթե միշտ ջրային կյանք է վարում։ Նա հիմնականում ապրում է հանգիստ, ոչ արագընթաց գետերում և Ամազոնի ու Օրինոկոյի փոքր լճերում։
Հասուն անակոնդայի համար բնության մեջ գրեթե չկան թշնամիներ։
«Սկզբում շատ սարսափելի էր, քանի որ ես երբեք իմ կյանքում այդքան չէի մոտեցել օձերին, առավել ևս՝ անակոնդային։ Բոլորն էլ գիտեն, որ նրանք շատ վտանգավոր են։ Բայց ես հասկացա, որ ոչինչ էլ չի լինի, եթե հարգանքով վերաբերվես այս կենդանիներին։ Համենայն դեպս, նրանք բավականին խոշոր են, և դու կհասցնես նկատել նրանց շարժումները»,– ավելացրել է լուսանկարիչ Ֆրանկոն։
Ներկայում հայտնի ամենամեծ անակոնդան հասնում է 9 մետրի և կշռում մոտ 130 կգ։ Այն գտնվում է Նյու Յորքի կենդանաբանական այգում։
Աշխարհի շատ կենդանաբանական այգիներում անակոնդաներ կան, սակայն ազատությունից դուրս նրանց կյանքը բոլորովին այլ է, և նրանք դժվարություններ են կրում։
Անակոնդայի կյանքի առավելագույն տևողությունը 28 տարի է, սակայն անազատության մեջ նրանք ապրում են հիմնականում 5-6 տարի։
Անակոնդաները հիմնականում սնվում են տարբեր կաթնասուններով, որոնց հայթայթում են ջրային տարածքներում և դրանց մոտակայքում։ Նրանք կարող են ուտել թռչուններ, կրիաներ, փոքր կայմաններ և խիստ հազվադեպ՝ այլ օձեր։ Թեպետ մի անգամ կենդանաբանական այգում հսկա անակոնդան կերել է 2.5 մետրանոց պիթոնի։
