Րոպեներ առաջ «Իրավունքին» հաջողվեց կապ հաստատել էքստրասենս Կարեն Ափոյանի` այսօր իր բնակարանում սպանված «Վեցերորդ զգայարան» հաղորդաշարի էքստրասենս, 53-ամյա Անի Մաջնունյանի գործընկերոջ հետ եւ մեկնաբանություն վերցնել տիկին Մաջնունյանի սպանության մասին:
Հիշեցնենք` օգոստոսի 5-ին, սպանություն է տեղի ունեցել Երևանում: Ժամը 18:30-ի սահմաններում ոստիկանության Մաշտոցի բաժին ահազանգ է ստացվել, որ Մազմանյան 5 շենքի բնակարաններից մեկում կնոջ դի կա: Պարզվել է, որ սպանվածը «Վեցերորդ զգայարան» հաղորդաշարի էքստրասենս Անի Մաջնունյանն է:
Կարեն Ափոյամը դժվարացավ մեկնաբանել տեղի ունեցածը, բայց ասաց, որ Անի Մաջնունյանին հանդիպել է չորս ամիս առաջ: «Ես նրան զգուշացրել էի որոշ բաներ»:
-Որոշ բաներ ասելով` ի՞նչ նկատի ունեք: Միգուցե մահվան փա՞ստը:
-Ես ասել էի, որ նա առողջականի հետ կապված լուրջ խնդիրներ ունի: Երեւում էր, որ կյանքի գիծը կարճ էր: Նրան այդ մասին ակնարկեցի ու, այսպես ասած, խոսքս հեռվից սկսեցի: Ասացի` զգո՛ւյշ եղիր, ուշադի՛ր եղիր, քեզ հետեւի:
-Այսինքն` մահվան փաստ ինչ-որ տեղ այդքան էլ անսպասելի չէր Ձեզ համար:
-Ցավոք սրտի, ինչ-որ տեղ` այո: Սա ուղղակի դաժանություն է:
-Արդյոք սա կարող ենք համարել բնակարանային հերթական գողությունը:
-Այո: Դա իր մասնագիտական աշխատանքի հետ կապ չունի: Մտածել են` միայնակ կին է, հարազատ չուներ, անպաշտպան է: Նրա տունն էլ տարբեր մարդիկ էին մտնում:
-Կարո՞ղ ենք չբացառել, որ մարդասպանը նրա հաճախորդներից կարող է լինել:
-Անպայման: Սա ոստիկանության համար դժվար բացահայտվող գործ չէ:
-Տիկին Մաջնունյանը միայնա՞կ էր ապրում:
-Այո: Նա ամուսին, երեխա չուներ:
- Արդեն տեսակետ է հնչում, որ եթե էքստրասենսը եթե չի կարողանում իր հետ կատարվելիք դեպքերը գուշակել, ապա «Վեցերորդ զգայարան» հաղորդաշարը դերասանություն է:
-Նախ դա գուշակություն չէ: Անին հիրոմանտիայով էր զբաղվում: Դա գուշակություն չէ, այլ բացահայտում: Մի օրում կարող է մարդու ճակատագիրն ամբողջությամբ փոխվել: Որոշ բաներ կարող ես տեսնել, զգուշացնել, բայց ֆանտաստիկ գուշակություններ անելը ամեն մարդու տրված չէ: Ավելին` հաճախ շատ տեղեկատվություն չարի ուժի ազդեցությամբ է գալիս: Ես ինձ գուշակ չեմ համարում:
-Հնչող տեսակետի իմաստն այն է, որ մի՞թե Անին չէր կանխազգում կամ կանխատեսել իր հետ տեղի ունենալիքը:
-Լավ ենթադրենք իմացել էր, ինչ կարող էր անել:
-Դե գուցե դիմեր իրավապահներին:
-Դե իրավապահներն էլ կասեին` դու քեզ լավ պաշտպանի:
-Ինչպես արձագանքեց Անին, երբ ակնարկեցիք նրա առողջական խնդիրների մասին: Լուրջ ընդունե՞ց Ձեր խոսքերը:
-Չէ, լուրջ չէր ընդունում: Եթե իրեն հուզեր իմ ասածը, ես նրան ավելի կոնկրետ բաներ կասեի: Անիի մոտ վերջին շրջանում ներքին վախեր էր նկատվում: Այդ ներքին վախերը բոլորի`մոտ քսան-երեսուն տոկոսի մոտ են նկատվում: Նա լավ շատ գիտեր, որ մենակ էր ապրում, գումար էր աշխատում: Այսինքն` այդ վախերն արդեն ստեղծվել էին: Եթե այդ վախերը նա չունենար, հաստատ իր հետ ոչինչ չէր պատահի:
