Մեր գաղջ իրականության մեջ դժվար է գտնել երկրորդ այդ աստիճան ցինիկ ու նյարդայնացնող երևույթ, քան մեր նախկին ու գործող պետպաշտոնյաների էլիտար հարսանիքներն են։ Սրանք բառիս բուն իմաստով խրախճանքներ են ժանտախտի ժամանակ, և ամեն նման էլիտար հարսանիքը ապտակ է՝ հասցված ժողովրդին։
Ասես լկտիաբար կանգնեն ու ասեն մեզ. հա, կովեր ջան, կթել ենք ձեզ այսքան տարի, հիմա էլ էդ կթած փողերով մեր բալեքին ենք նոր կյանք ճամփում, ու ջհանդամ, թե ձեր բալեքը կյանքում էդքան փող չեն տեսնի, ինչքան մենք ծախսում ենք մենակ սեղանների վրա դրվող ձկնկիթի վրա։
Մի քանի օր առաջ ԳՇ պետի տեղակալ գեներալ-լեյտենանտ Բաղմանյանի երեխու հարսանիքն էր, որը հեչից մի քանի հարյուր հազար դոլար է արժեցել, էս քանի օրը մաքսայինի նախկին պետի երեխունն ա, որն էլի ոչնչով չի զիջելու... Լավ, մի՞թե կարելի է այս աստիճան ծաղրել ու արհամարհել այն ժողովրդին, որից դու սերում ես։ Ախր լափելուն էլ ձև կա, ու ամենավերջին հանցագործները, նույնիսկ սերիական մարդասպանները խղճի խայթ են ունենում, իսկ սրանց վեջն էլ չի. վզները հաստացնելուց զատ՝ կաշիներն էլ են հաստացրել այն աստիճան, որ էլ անգամ զրահաբաճկոն պետք չէ։
Մի քիչ համեստ մնացեք էլի, ձեր տունը շինվի։ Դուք արդեն անեծքի տակ եք, ձեր երեխեքին էլ մի՛ քաշեք էդ անեծքների տակ։
