Համայնքը հնարավոր է խոշորացնել, մեծացնել միայն ծնելիության, բնակարանաշինության, տնտեսության և այլ գործոնների խթանմամբ, այլ ոչ թե համայնքներն իրար միացնելով։
Գոնե այլ տերմին մտածեք։ Թե չէ «համայնքների խոշորացումն» արդեն տրամաբանորեն անհեթեթություն է։ Երկու համայնքն իրար միացնելով՝ մեկ նոր համայնք չի ստացվում։ Երկուսն էլ մնում են՝ ամեն մեկն իր յուրահատուկ բարբառով, խոհանոցով, հարևանությամբ, վարքագծային մոդելներով և այլն։
Տասնամյակներ առաջ Հացառատ ու Արծվաքար համայնքները միացվել են Գավառին՝ քաղաքի կարգավիճակ տալու համար։ Բայց հիմա էլ հացառատցիներն ամեն հարմար առիթով ուզում են առանձնանալ Գավառից, ստեղծել են հիմնադրամ, որ հոգում է իրենց համայնքի առաջնային խնդիրները և այլն։
Նույնը Սևանում է։ Գոմաձորն ու Ցամաքաբերդը միացվել են Սևանին, բայց լրիվ առանձին համայնքներ են։ Ու Սևանի փողոցները տեսնողը կհասկանա, որ այս երկու գյուղերի փողոցները հաստատ ավելի վատ վիճակում են։
Ասածս ինչ է՝ սկզբում նպատակները դրեք (այլ ոչ թե թվեք պրոբլեմները), հետո գործիքները մշակեք։ Ձեր թվարկած նպատակներին հասնելու հաստատ ավելի արդյունավետ տարբերակներ կան, քան առանձին համայնքներն իրար բռնակցելը։
