ՊԲ զինծառայողը մահացել է ֆուտբոլ խաղալիս ստացած վնասվածքի հետևանքով

Tert.am-ը գրում է.

ՊԲ զինծառայողը մահացել է ֆուտբոլ խաղալիս ստացած վնասվածքի հետևանքով, դեպքի առթիվ նախապատրաստվում են նյութեր. այս մասին հայտնում են ՀՀ քննչական կոմիտեի մամուլի ծառայությունից։

ՔԿ հաղորդագրության մեջ ասվում է. «09.04.2015թ.՝ ժամը 19:40-ի սահմաններում, Ստեփանակերտի զինվորական հոսպիտալում մահացել է N զորամասի ժամկետային զինծառայող, շարքային Արթուր Անդրանիկի Առաքելյանը, ով զինվորական հոսպիտալ էր տեղափոխվել 05.04.2015թ., ժամը 17:45-ին՝  բաց գանգուղեղային վնասվածք, հիպովոլեմիկ շոկ, կոմա ախտորոշմամբ:

Զինծառայողը վնասվածքն ստացել էր դժբախտ պատահարի արդյունքում՝ 05.04.2015թ.՝ ժամը 17:20-ի սահմաններում, զորամասում ֆուտբոլ խաղալու ժամանակ, ձեռքերով դարպասաձողից կախվելիս վայր ընկնելու և դարպասը գլխին ընկնելու հետևանքով:

Դեպքի առթիվ ՀՀ ՔԿ զինվորական քննչական գլխավոր վարչությունում նախապատրաստվում են նյութեր»։

Հիշեցնենք, որ ավելի վաղ հայտնի էր դարձել, որ Լեռնային Ղարաբաղի Հանրապետության ՊԲ արևելյան ուղղությամբ տեղակայված զորամասերից մեկում տեղի ունեցած դժբախտ պատահարի հետևանքով մահացել է զինծառայող, 1996թ. ծնված Արթուր Անդրանիկի Առաքելյանը: