Life.panorama.am-ը գրում է.
Դերասան Էմիլ Գալստյանը, ով հեռուստադիտողին առավել ծանոթ է «Շանթ» հեռուստաընկերության «Բանակում» և «Քաղաքում» սերիալներից՝ Համբարձումի կերպարով, որոշել է սերիալային դադար վերցնել և վերսկսել թատերական գործունեությունը: «Այժմ ցանկանում եմ էկրանային դադար պահել, քանի որ երկար ժամանակ անընդհատ էկրաններին էի: Նաև, ուզում եմ ներկայացումով հանդես գալ, կարոտել եմ թատրոնը: Սակայն, որոշ ժամանակ անց նորից կընդունեմ առաջարկներ, լինի դա սերիալային, թե ֆիլմի»,-Life.Panorama.am-ի հետ զրույցում նշեց նա:
Այժմ Էմիլը մոնոներկայացում է պատրաստում, որը հանդիսատեսին կհանձնվի մայիսի վերջին. «Կոչվում է «Վերջին ուղևորը»: Մոնոներկայացումը արտագաղթի թեմայով է. երկրից բոլորն արտագաղթում են: Մասնագիտությամբ դիրիժոր մի մարդ, հանգամանքների բերումով ուշանալով ինքնաթիռից՝ մնում է Հայաստանում՝ միայնակ: Ի դեպ, դա ոչ շատ հեռավոր Հայաստանն է՝ 2040 թվականը: Սյուժեում մարդկանց այսօրվա մտածելակերպն է: Անդրադառնում ենք նաև օլիգարխներին, նրանց վերաբերմունքին ժողովրդի հանդեպ, ապրելակերպին: Չենք անտեսի նաև Ազգային ժողովը»:
Ներկայացման սցենարիստն է Լևոն Բեգլարյանը: Թե ո՞ր թատրոնի բեմ այն կբարձրանա, դեռևս հայտնի չէ: Ամեն ինչ պարզ կլինի մինչ այս ամսվա վերջ: