Դևոնի բնակիչներ Դենիսը և Գլենը ամուսնացան մի քանի տարի առաջ։ Տարբեր բժիշկների մոտ հետազոտվելուց հետո նրանք կարծում էին, թե երբեք չեն կարող երեխա ունենալ, սակայն ի վերջո մեկ երեխայի փոխարեն երեքն ունեցան։ Գլենի մոտ ամորձիների քաղցկեղ էր հայտնաբերվել։ Բարեբախտաբար, բժիշկները կարողացան բուժել նրան այս մահաբեր հիվանդությունից, սակայն բուժման ընթացքում այնպիսի միջամտություներ կատարվեցին, որոնց արդյունքում տղամարդն ամլացավ։
Այս հրաշք բալիկները լույս աշխարհ եկան արտամարմնային բեղմնավորման արդյունքում։ Գլենի սերմնահեղուկը սառեցվել ու պահվել էր լաբորատոր պայմաններում: Օգտագործելով սառեցված սերմնահեղուկը՝ բժիշկները բարեհաջող կերպով 8 սաղմ ստացան արտամարմնային բեղմնավորման ճանապարով։ Այս հրաշք մեթոդի շնորհիվ ամուսինները 3 տարի առաջ դուստր ունեցան, ում անվանեցին Մեյզի։ Մոտ 9 ամիս առաջ սաղմերի միևնույն փաթեթը կրկին օգտագործվեց, ու անցյալ շաբաթ ծնվեցին երկվորյակներ Քարթերն ու Քարսոնը։ Գլենը, ով ժամանակին հրշեջ էր աշխատում, ասել է.
Բժիշկների թիմը մեզ ասաց, որ երեխաները եռյակ են համարվում, քանի որ նրանք ծնվել են սաղմերի այն փաթեթից, որն ստեղծվել է միևնույն ժամանակ։ Իսկապես զարմանալի է, որ թեպետ նրանք եռյակ են, նրանց միջև գրեթե 3.5 տարվա տարբերություն կա։
Գլենը, ով այժմ 35 տարեկան է, ամլացել է 20 տարեկանում, սակայն նախքան նրա մոտ ամլություն կգրանցվեր, նա հասցրեց սառեցնել իր սերմնահեղուկը։ Նա իր ներկայիս կնոջ հետ ամուսնացավ նրա հետ հինգ տարվա համատեղ կյանքից հետո, ու ամուսնությունից կարճ ժամանակ անց նրանք դիմեցին արտամարմնային բեղմնավորման։
Հարցազրույցներից մեկի ընթացքում Գլենն ասել է. «Ես մի տարօրինակ ուռուցք ունեի, որն աճում էր ամորձուս մեջ։ Երեխա ունենալու միակ տարբերակն արտամարմնային բեղմնավորումն էր: Ես միշտ ցանկանում էի երեխա ունենալ ու համապատասխան ֆինանսական հովանավորություն ստանալուց հետո կնոջս հետ դիմեցի արտամարմնային բեղմնավորման։ Բարեբախտաբար բեղմնավորումը հաջող անցավ, և ծնվեց Մեյզին։ Երկրորդ անգամ մենք մեր սեփական գրպանից վճարեցինք արտամարմնային բեղմնավորման ծախսերը, և մեկի փոխարեն երկու գեղեցիկ բալիկ ունեցանք։ Ես աշխարհի ամենաերջանիկ մարդն եմ։ Թեպետ ես կարծում էի, որ ողջ կյանքում այդպես էլ երեխա չեմ ունենա, ես այժմ երեք առողջ բալիկ ունեմ»։
Գլենի կինը հավելել է, որ երբ լսել է, որ զույգ է ունենալու, երջանկությունից արտասվել է, իսկ Գլենը զարմանքից գունատվել։ Այս հրաշք բալիկներին իսկապես կարելի է Աստծո պարգև համարել։
