Tert.am-ը գրում է.
Այսօր «Ժառանգություն» կուսակցությունը քննարկում էր հրավիրել «Թուրքիայի Հանրապետության կողմից հայրենի բնօրրանի՝ Հայաստանի տարածքների բռնազավթումը և հայ ժողովրդի մեծ հայրենազրկումը դատապարտելու մասին» թեմայով:
Քննարկման նախաձեռնող ԱԺ «Ժառանգություն» խմբակցության անդամ Զարուհի Փոստանջյանը նշեց, որ անհրաժեշտ է օրենք ընդունել, որով դատապարտվի Թուրքիայի Հանրապետության կողմից Հայաստանի տարածքների բռնազավթումը, ինչը պետք է լինի ազգային անվտանգության բաղադրիչ մաս և պետք է նշել, որ «մենք հետամուտ ենք մեր հայրենիքի վերադարձին»:
«Հայաստանի և Թուրքիայի ներկայիս սահմանը օրինական չէ, այլ 21 թվականի Մոսկվայի պայմանագրի հետևանք է, որը վիճարկելու ենք և վերանայման կարիք ունի»,- ասաց նա:
Զարուհի Փոստանջյանը նշեց, որ տեղի են ունենում տարբեր իրադարձություններ և պետք է պատրաստ լինել ներկայիս գործող քարտեզի վերաձևավորմանը, որի գործիքներից մեկը պետք է լինի օրենքի և նոր ռազմավարական հայեցակարգի ընդունումը Հայաստանի Հանրապետության կողմից:
«Հասկանալի է, որ եթե չլինի ազգահավաք, չենք կարող իրականացնել հողահավաք»,- ասաց նա և նշեց, որ դրա համար պետք է ունենալ լիարժեք քաղաքացիներ, ովքեր հետամուտ պետք է լինեն մեր պատմական հայրենիքի վերադարձմանը:
«Մենք տարածքների հետ վերադարձի խնդիր պետք է դնենք ոչ միայն միջազգային հանրության առաջ, այլ նաև որպես մեր պետության պետական ծրագիր»,- ասաց նա:
