Մանգուս անունով այս կորյունն Իսպանիայի կրկեսներից մեկի այցեքարտն էր։ Կրկեսի տնօրինությունը 20 եվրո էր պահանջում այն այցելուներից, ովքեր ցանկանում էին լուսանկարվել նրա հետ, իսկ ցանկացողների թիվը շատ մեծ էր։ Կրկեսի աշխատակիցները գիտակցում էին, որ Մանգուսն այցելուների շրջանում այդքան մեծ պահանջարկ կվայելի այնքան ժամանակ, քանի դեռ փոքր-մոքր է ու փիսիկի մռութիկ ունի։ Նրանք հասկանում էին, որ հասուն առյուծն այդքան եկամուտ չի բերի իրենց, որքան փոքրիկ կորյունը։ Այդ իսկ պատճառով նրանք գրեթե սովամահության էին հասցրել այս առյուծին, որպեսզի նա չմեծանա։
Առյուծն արդեն 4 ամսական է, սակայն մինչև վերջերս նրան միայն յոգուրտ ու հաց էին տալիս։ Իմանալով կրկեսի աշխատակիցների այս դաժան վերաբերմունքի մասին՝ անասնաբույժները միջամտեցին։ Անազատության մեջ ծնված այս առյուծը պետք է առնվազն երկու ամիս առաջ մսային կեր ստանար, սակայն քանի որ կրկեսի աշխատտակիցներն իրենց ճղճիմ շահերը գերադասել էին առյուծի առողջությունից, Մանգուսն այժմ թերսնված է։ Բուժստուգումներից մեկի արդյունքում պարզ էր սարձել, որ կենդանու կերակրափողը փոքրացել էր, որովհետև խեղճը երբեք կարգին սնունդ չէր ընդունել։
Մանգուսը վիրահատական սեղանին
Կենդանիների պաշտպանությամբ զբաղվող «Lets Adopt» (թարգմանաբար՝ եկեք որդեգրենք) բարեգործական ընկերությունն իր վրա վերցրեց կերակրափողի լայնացման վիրահատության ծախսերը, թեպետ սովորաբար այս կազմակերպությունը միայն կատուների ու շների բուժմամբ է զբաղվում։ Վիրահատությունը բարեհաջող ընթացավ, և Մանգուսը հիմա կարողանում է առյուծին վայել սնվել։
Նրա քաշը կամաց-կամաց ավելանում է։ Երբ Մանգուսին ազատեցին կրկեսի ստոր աշխատակիցների ճիրաններից, նա ընդամենը 11 կգ էր կշռում, իսկ հիմա՝ 22 կգ։ Մանգուսը վայրի բնության մեջ փրկվելու շանսեր չունի։ Բանն այն է, որ անգամ վիրահատությունից հետո նրա կերկրափողն այնքան նեղ է, որ նրա կերը պետք է կտրատված վիճակում մատուցվի նրան։ Առաջիկայում Մանգուսին դեռևս մի քանի վիրահատություն է սպասվում, սակայն նրա կյանքին վտանգ չի սպառնում։
