Bem.am-ը գրում է.
«Հոգեբանությունն ինձ շատ է օգնում հասկանալ և զգալ տվյալ կերպարը, որը պետք է ստանձնեմ»
Հենց այսպես բնութագրեց իր մասնագիտությունը մասնագիտությամբ հոգեբան, իսկ հանրությանը «Անծանոթը» և «Սիրո գերին» հեռուստասերիալներից հայտնի սիրված դերասանուհի Սոֆյա Պողոսյանը BEM.am կայքի հետ զրույցի ժամանակ:
Սոֆյան ասաց, որ հոգեբանությունը հենց այն մասնագիտությունն է, որն առնչվում է մարդու հետ, նրա հոգու, հույզերի և զգացմունքների հետ: Այն սերտորեն կապված է բոլոր բնագավառների և մասնագիտությունների հետ.«Իսկ դերասանության հետ՝ հատկապես, քանի որ դերասանի մասնագիտությունը նույնպես առաջին հերթին կապված է մարդկային հույզերի, զգացողությունների հետ»:
Չնայած նրան, որ Սոֆյան հոգեբանություն դասավանդելու մի փոքր փորձ ունի, բայց հիմա չի զբաղվում հոգեբանությամբ,այլ ունի մեծ ձեռքբերումներ դերասանական կյանքում:
Նա մեզ հետ զրույցում նշեց, որ այնքան էլ կարճ ժամանակում ձեռք չի բերել հաջողություններ.«Ես ինքս դեռ չեմ համարում, որ հասել եմ հաջողության: 6 տարի առաջ եմ մուտք գործել այս ոլորտ և պետք է ասեմ, որ բավականին դժվար էր սկզբում քո տեղը գտնել արդեն վաղուց կայացած և սիրված դերասանների կողքին՝ չնայած նրանք շատ են օգնել և շատ բան եմ սովորել հենց իրենցից»:
Իսկ ահա գեղեցկուհի դերասանուհին իր հաջողության գաղտնիքը համարում է սերը և աշխատասիրությունը դեպի ընտրած մասնագիտությունը.« Կարծում եմ՝ ցանկացած բնագավառում հաջողության հասնելու գաղտնիքը աշխատանքդ սիրելու և ամեն օր նոր բան սովորելու և կատարելագործվելու մեջ է»:
Սոֆյա Պողոսյանը չի սիրում խոսել անձնականին վերաբերող թեմաներից, իսկ ահա իր սիրո մեջ գերության մասին խոսելիս ասաց. «Կարծում եմ՝ ցանկացած սիրող մարդ էլ ինչ-որ չափով այդ սիրո գերին է, քանի որ առանց դրա էլ չի կարող ապրել»:
Դերասանուհին այս տարվա հետ կապված ունի շատ նպատակներ և ծրագրեր, «սակայն ժամանակից առաջ ընկնել պետք չէ…»:
BEM.am կայքը հմայիչ դերասանուհի Սոֆյա Պողոսյանին մաղթում է նորանոր հաջողություններ և ձեռքբերումներ յուրաքանչյուր հարցում…
