Նեպալում ուրբաթ առավոտյան ինքնաթիռի անկումից քիչ անց նրա օդաչուն հայտնել է ավիահսկիչին, որ նա բախվել է թռչնի հետ: Ինչպես հաղորդում է AFP-ն, այս վարկածի պաշտոնական հաստատումը, որ թռչունն է հանդիսացել ինքնաթիռի անկման պատճառ, դեռևս չի ստացվել:
Այլ տեղեկություն է հաղորդում Associated press-ը: Կատմանդուի օդանավակայանում, որտեղից ինքնաթիռը թռիչք էր կատարում, աշխատակիցը հայտնում է, որ թռիչքից երկու րոպե անց օդաչուն հայտնել է անսարքության մասին:
«Sita Air» ավիաընկերության ինքնաթիռի անկումը տեղի է ունեցել տեղական ժամանակով 7-30-ի սահմաններում Կատմանդուի օդանավակայանից 500մ հեռավորության վրա: Ականատեսների վկայությամբ`անկման պահին ինքնաթիռն այրվում էր, և նույնիսկ գետնին բախվելուց հետո օդանավում գտնվող ուղևորները դեռևս կենդանի էին: Չնայած նրան, որ օդանավը վայր է ընկել գետի ափամերձ շրջանում, տեղաբնակները չեն մարել կրակը՝ վախենալով, որ ինքնաթիռը կարող է պայթել:
Բոլոր 19 ուղևորները զոհվել են. հաղորդում է Agence France-Presse-ը։ Զոհվածներից 16-ը ինքնաթիռի ուղևորներ էին (12-ը այլ երկրների քաղաքացիներ), 3-ը՝ անձնակազմի անդամ։

Կայքում տեղ գտած մտքերն ու տեսակետները հեղինակի սեփականությունն են և կարող են չհամընկնել BlogNews.am-ի խմբագրության տեսակետների հետ:
print Տպել