Այսօր ակներև է, որ քաղաքական դաշտում հարաբերական անդորր է տիրում: Այնուամենայնիվ, օրերս մի քանի քաղաքական ուժի ներկայացուցիչներ հանդես եկան հայտարարություններով` ամփոփելով 2014 թվականի քաղաքական անցուդարձը:
Մամուլում երեկ և այսօր շրջանառվում էր նաև Արթուր Բաղդասարյանի ամփոփիչ ասուլիսը: Մասնավորապես, խոսելով իր քաղաքական հետագա գործունեության, հնարավոր քաղաքական մերձեցումների մասին, ՕԵԿ նախագահն անդրադարձել է նաև երկրի տնտեսական վիճակին, ինչպես նաև պետության կողմից իրականացվող սոցիալ-տնտեական քաղաքականությանը:
Արթուր Բաղդասարյանն անդրադարձել է նաև ՕԵԿ-ի և կառավարության հնարավոր համագործակցությանը, մեջբերեմ. «Մենք հեքիաթներում չենք ապրում, որ կախարդական փայտիկից խոսենք: Ապրում ենք ռեալ իրականության մեջ: Ինչ վերաբերում է համագործակցությանը, գոնե ՕԵԿ-ն առավելապես կառուցողական է եղել: Մենք պատրաստ ենք աջակցել կառավարության ցանկացած լավ նախաձեռնության, մենք թշնամիներ չենք»:
Ճիշտ է նկատել պարոն Բաղդասարյանը` մենք հեքիաթներում չենք ապրում: Լավ կլիներ, որ վերոգրյալ մտքից մեկ այլ հետևություն աներ ՕԵԿ առաջնորդը: Միայն հեքիաթներում և դրամատիկ ժանրի ֆիլմերում մարդիկ կարող են նորից հավատալ ու վստահել Բաղդասարյանի նման անսկզբունք, դավաճան քաղաքական գործչին: Այն բնորոշումներն, որոնցով կնքել են Բաղդասարյանին հասարակ մարդիկ, նույնիսկ հանրային հարթակում գրելու համար կոպիտ են:
Ճիշտ կաներ ՕԵԿ առաջնորդը՝ գոնե լռեր և զզվանքի նոր ալիք չբարձրացներ իր անձի և վերջնականապես հեղինակազրկված կառույցի վերաբերյալ:
