Դեռևս 2002թ.-ին պետական գույքի մասնավորեցման պայմանագրով «Ագրոհոլդինգ Արմենիա» ՍՊԸ-ն ձեռք է բերել Դավիթ-Բեկի 201 հասցեում գտնվող անավարտ շինությունը` 1.5 հա հողատարածքով, իսկ 2003թ.-ի հունիսին կառավարությունը որոշում է կայացրել փոխել շինությանը կից հողերի նպատակային նշանակությունը՝ տարածքը ճանաչելով արտադրական, և «Ագրոհոլդինգ Արմենիա» ՍՊԸ-ին տրամադրել լրացուցիչ 2.8 հա հողամաս` 50 տարի ժամկետով: «Ագրոհոլդինգ Արմենիա» ՍՊԸ-ին նշյալ տարածքը տրամադրվել է ավելի քան 1,5 մլն եվրո ներդրումային ծրագիր իրականացնելու նպատակով: Ծրագրով նախատեսվում է ինչպես տարածքի ամբողջական բարեկարգում՝ ասֆալտապատում, կանաչապատում, այնպես էլ ավելի քան 240 աշխատատեղերի ստեղծում:
2004 թ.-ի հունիսի 29-ին «Ագրոհոլդինգ Արմենիա» ՍՊԸ-ի քարի մշակման գործարանի աշխատանքային նախագծի վերաբերյալ Բնապահպանության նախարարության կողմից իրականացվել է շրջակա միջավայրի վրա ազդեցության փորձաքննություն և տրվել դրական եզրակացություն (Եզրակացություն թիվ ԲՓ-52, 29.06.2004): 
Երբ ընկերության ֆինանսական կայունացումը հնարավորություն ընձեռեց մեկնարկելու ներդրումային ծրագրի իրականացումը, Ընկերությունը բախվեց այլ խնդրի: Պարզվեց, որ մեր որոշ հայրենակիցներ տարածքում իրականացրել են ապօրինի շինարարական աշխատանքներ, որոշներն անգամ՝ հաստատել բնակություն: Քաղաքացիներին ներկայացվել է պրոբլեմը, առաջարկվել Ընկերության հնարավորությունների շրջանակներում աջակցելու, ինչը սակայն մերժվել է, և ցավոք, ստիպված ենք եղել մեր իրավունքները պաշտպանել դատական կարգով: Անգամ 2014 թ.-ի մարտին, երբ կայացվեց Վճռաբեկ դատարանի որոշումը, որի արդյունքում քաղաքացիները ստիպված էին ազատել տարածքն ու սեփական միջոցներով ապամոնտաժել շինությունները, կրկին Ընկերության կողմից առաջարկվել է աջակցելու մեր հայրենակիցներին, անգամ նրանց, ովքեր որևէ շինություն չեն կառուցել: Ցավոք, կրկին ապարդյուն: Դատարանի որոշումից 4 ամիս անց ստիպված ենք եղել դիմել ԴԱՀԿ՝ ապահովելու Դատարանի որոշման կատարումը:
Հաշվի առնելով, որ տարվա այս եղանակին բնակարանից տեղափոխումը կարող է առաջացնել խնդիրներ, համաձայնել ենք մինչև գարուն որևէ քայլ չձեռնարկել, դեռ ավելին, շարունակելով հավատարիմ մնալ ընկերության աշխատաոճին, անգամ այս պարագայում պատրաստակամ ենք նշյալ խնդրի լուծման հարցում ընկերության հնարավորությունների սահմաններում աջակցելու քաղաքացիներին:
Քաջ գիտակցում ենք մեր քաղաքացիներին հուզող հարցերն ու կիսում մտահոգությունները, սակայն մյուս կողմից էլ ընկերությունը տարիներ շարունակ չունի հնարավորություն իրականացնելու ծրագիրը, ինչն իր հերթին նպաստելու է քաղաքի բարեկարգմանն ու նոր աշխատատեղերի ստեղծմանը:
Եվս մեկ անգամ կոչ ենք անում ցուցաբերել կառուցողական մոտեցում և համակողմանի քննարկման արդյունքում գտնել պրոբլեմի լուծման օպտիմալ լավագույն տարբերակը շահագրգիռ բոլոր կողմերի համար:

Կայքում տեղ գտած մտքերն ու տեսակետները հեղինակի սեփականությունն են և կարող են չհամընկնել BlogNews.am-ի խմբագրության տեսակետների հետ:
print Տպել