1in.am-ը գրում է․
MTV երաժշտական հեռուստաալիքը շոտլանդական Գլազգո քաղաքում կիրակի երեկոյան բաշխել է Europe Music Awards-ի պարգևները՝ հայտնում է RIA Novosti-ն:
Լավագույն երգիչ է ճանաչվել կանադացի Ջասթին Բիբերը, լավագույն ռոք խումբ՝ Linkin Park-ը:
Լավագույն երգ է ճանաչվել ամերիկուհի Արիանա Գրանդեի Problem ստեղծագործությունը: Հենց նա էլ արժանացել է «Լավագույն երգչուհու» տիտղոսին:
Լավագույն փոփ կատարող է անգլո-իռլանդական One Direction խումբը: Այս խմբին է շնորհվել մրցանակը նաև «Լավագույն համերգային ելույթ» անվանակարգում:
Հիփ-հոփ ոճում լավագույնն է ճանաչվել ամերիկուհի Նիկի Մինաժը: Քեթի Փերին միանգամից երկու մրցանակի է արժանացել՝ «Լավագույն տեսահոլովակ» և «Լավագույն կերպար» անվանակարգերում:
Լավագույն այլընտրանքային խումբն ամերիկյան Thirty Seconds to Mars-ն է, իսկ լավագույն նոր խումբը՝ ավստրալական փոփ ռոք 5 Seconds of Summer խումբը, որը հիմնադրվել է 2011 թվականին՝ Սիդնեյում:
Շոտլանդացի DJ Քելվին Հարիսը MTV Europe Music Awards-ի վարկածով՝ լավագույն էլեկտրոնային կատարողն է:
MTV Europe Music Awards-ի հաջորդ արարողությունը կկայանա Միլանում: