10. Էմմ. ֆրիսբբի վարպետը
Էմմը բորդեր-կոլլի է Չինաստանից։ Նա հոյակապ դուետ է ստեղծել իր տիրոջ՝ Չժու Պենի հետ։ Ընդամենը 3 րոպեյի ընթացքում նա կարողացել է 16 թռչող սկավառակ բռնել։ Այդ սկավառակները նետում էր Շժու Պենը։ Ուրիշ ոչ մի շուն դեռևս չի կարողացել գերազանցել Էմմի սահմանած ռեկորդը։ Այս «սխրագործությունը» կատարվեց Պեկինում 2011 թ.-ին անցկացվող մրցումների ժամանակ։ Այս ռեկորդի շնորհիվ Էմմը հռչակվեց աշխարհի ամենադինամիկ շուն։
9. Օգի. թենիսի գնդակների ամենահմուտ փոխանցողը
Ոսկեգույն ռետրիվեր Օգին թենիսում վարպետացած ամենատաղանդավոր շունն է։ Նա վազում է թենիսի գնդակների հետևից և դրանք բերանով հասցնում թենիսիստներին։ 2003 թ.-ին նա 5 գնդակ միաժամանակ տեղ հասցրեց՝ բոլոր հինգն էլ պահելով բերանում։ Ոսկեգույն ռետրիվերների բերանները շատ փափուկ են. նրանք կարող են անգամ հում ձու պահել բերանում՝ առանց այն կոտրելու։ Ահա թե ինչու թենիսի գնդակներն անվնաս են մնում այս շան բերանում։ Ավելի քան տասը տարի է, ինչ Օգիի ռեկորդը գերազանցող չի եղել։
8. Սմոքի. ամենաբարձր գռմռացողը
Այս գեղեցիկ բրիտանացի կատուն աշխարհի ամենաբարձր գռմռացողի տիտղոսն է կրում։ Սմոքին 14 անգամ ավելի բարձր է գռմռում, քան միջին վիճակագրական կատուն։ 1 մետր հեռավորության վրա նրա գռմռոցը հասնում է 67,7 դեցիբելի։ Այս գորշ կատվի գռմռոցը գրեթե նույնքան բարձ է, որքան գազոնահնձիչի ձայնը։ Սմոքին միջազգային աստղ է։ Նրան ցույց են տվել մի քանի լրատվական հաղորդումներով և նրա մասնակցությամբ տեսանյութեր ու նրա մասին հոդվածներ հրապարակել տարբեր կայքերում։ Այս կատվի մասին անգամ գիրք է գրվել, որը նա վերջերս ստորագրել է թանաքի մեջ թաթախված թաթով։ Ցավոք, Սմոքին այլևս չի կարողանա ոչ մեկին ստորագրություն տալ. այս տարվա օգոստոսին Սմոքին մահացավ, այո՛, հենց մահացավ և ոչ սատկեց, որովհետև սատկում են հասարակ կենդանիները, իսկ ռեկորդակիրները մահանում են։
7. Հեփփի. սքեյթբորդի վարպետը
Ոմանք Հեփփին շատ էքստրեմալ այծ են համարում։ Նա զբաղվում է սքեյթբորդով ու հասցրել է լուրջ հաջողությունների հասնել այս մարզաձևում։ 2012 թ.-ին Հեփփին ընդամենը 25 վայրկյանում հատեց 36 մետր տարածություն։ Սա այծի կողմից սքեյթբորդով երբևէ հատած ամենամեծ տարածությունն է։ Այս այծի տերերը հաճախ օգնում են նրան սահել. նրանք սքեյթբորդով սահում են այծի առջևից ու դեպի իրենց գրավում նրան զանազան մթերքների շնորհիվ։ Տեսնելով առաջարկվող հյուրասիրությունները՝ նա իր ողջ ուշադրությունը կենտրոնացնում է իր առջև դրված նպատակի վրա։ Իրականում Հեփփին կարող է էլ ավելի հեռուն սահել։ Այն անգամ, երբ նա ռեկորդ սահմանեց, նրա մրցույթն ավարտվեց սոսկ այն պատճառով, որ նա բախվեց ճանապարհին ծառացած կայանատեղային խոչընդոտին։ Սեյթբորդը Հեփփիի միակ ուժեղ կողմը չէ։ Նա կարողանում է նաև ձեռք սեղմել և նրա ընտանիքի անդամների խոսքերով՝ հանդիսանում է հոյակապ ընտանի կենդանի։
6. Զևս. աշխարհի ամենաբարձրահասակ շունը
Աշխարհի ամենաբարձրահասակ շան տիտղոսը պատկանում է Զևսին։ Այս գերմանական դոգի հասակը հասնում էր 1 մետրի, իսկ հետևի ոտքերի վրա կանգնած ժամանակ նրա հասակը հատում էր մեկ մետրի սահմանը: Նա Քևին Դուրլագի և նրա կին Դենիսի սիրելի ընտանի կենդանին էր: Նա աշխարհի ամենաբարձրահասակ շուն հռչակվեց 2012 թ.-ին։ Այդ ժամանակ նրա անունն ընդգրկվեց Գինեսի ռեկորդների գրքում, և նա միջազգային ճանաչում ձեռք բերեց: Զևսը 70 կգ էր կշռում: Նա ամեն օր մոտավորապես 13 կգ շան կեր էր ուտում: Ցավոք սրտի, այս տարվա սեպտեմբեր ամսին աշխարհի ամենաբարձրահասակ շունը մահացավ։
5. Միլլի. աշխարհի ամենափոքր շունը
Չիծուախուա տեսակի այս շունը 2013 թ.-ին հայտնվեց Գինեսի ռեկորդների գրքում՝ իբրև աշխարհի ամենափոքրիկ շունը։ Միլլիի հասակը 9,65 սմ է, իսկ քաշը՝ գրեթե 2450 գրամ։ Ծննդյան պահին այս շունն այնքան փոքրիկ էր, որ կարող էր տեղավորվել թեյի գդալի մեջ։ Նրա տերերը Պուերտո Ռիկոյում բնակվող արգենտինացիներ են։ Նրանց խոսքերով՝ Միլլիի խնամքը մշտական աշխատանք է իրենց համար։ Բանն այն է, որ Միլլին այնքան փոքրիկ է, որ տերերը հաճախ կորցնում են նրան իրենց տեսադաշտից։ Չնայած իր փոքրի չափերին՝ Միլլին մեծ սիրտ և կայտառ խառնվածք ունի։
4. Հերկուլես. աշխարհի ամենախոշոր կատվազգին
Գերմանական դոգ Զևսի ու Հերկուլեսի միակ ընդհանրությունը իրենց անունների դիցաբանական ծագումը չէ։ Հերկուլեսն աշխարհի ամենախոշոր լիգրն է, իսկ Զևսը, ինչպես ավելի վաղ նշեցինք, ամենախոշոր շունը։ Արու առյուծի և էգ վագրի խաչասերումից ստացված հիբրիդ կատվազգի լիգրը արտաքին տեսքով հիշեցնում է շերտավոր մեծ առյուծի։ Թեպետ բարոյագիտական համոզմունքներից ելնելով՝ շատ կենդանաբանական այգիներում լիգրերի բուծումն արգելված է, առյուծներն ու վագրերն, ըստ ամենայնի, թքած ունեն այդ կանոնների վրա և երբեմն անազատության մեջ խաչասերվում են իրար հետ։ Տվյալ պահին Հերկուլեսը բնակվում է Ջանգլ Այլենդում (Ջունգլիների կղզի)։ Այս կենդանու քաշը հասնում է 410 կիլոգրամի։
3. Օզի. աշխարհի ամենաարագաշարժ լարախաղացը
Օզի անունով հայտնի այս շունը աշխարհի ամենաարագաշարժ փահլևանն է։ Իր լարախաղացական ընդունակություններով նա գերազանցում է բազմաթիվ մարդ փահլևանների։ Նրանից ընդամենը 18,22 վայրկյան է պահանջվում, որպեսզի նա կարողանա անցնել 3,5 մետր երկարությամբ լարով։ Լարախաղացությունը Օզիի միակ տաղանդը չէ։ Այո, նա բազմակողմանիորեն զարգացած շուն է։ Նա բնատուր տաղանդ է դրսևորել ակրոբատիկայի մյուս ճյուղերում ևս։ Նա կարողանում է հավասարակշռությունը պահել և անշարժ մնալ իր տիրոջ ուսերին, մինչ տերը հեծանիվ է քշում։ Ըստ երևույթին, Օզին ի ծնե ակրոբատ է։ Նա շարունակ համալրում է իր ակրոբատական հնարքների ցանկը նորանոր բարդ համարներով։
2. Սվիթ Փի. աշխարհի ամենահավասարակշիռ շունը
Սվիթ Փիի սահմանած ռեկորդի պաշտոնական անվանումը բավականին բարդ է ու երկար. «ամենաշատ քանակությամբ աստիճաններ, որոնք շունը երբևէ իջել է գլխին բաժակ պահած վիճակում»։ Ավելի պարզ ասած՝ այս շունը՝ 150 միլիլիտր տարողությամբ բաժակը գլխին, կարողացել է տասն աստիճան իջնել։ Սվիթ Փին խառնածին շուն է (ավստրալիական հովվաշան ու բորդեր կոլլիի խառնուրդ)։ Նա այս ռեկորդը սահմանել է Գերմանիայում անցկացվող մի շոուի ժամանակ, թեպետ նրա հիմնական բնակության վայրն Ամերիկան է։
1. Փագի. «ամենալեզվանի» շունը
Այս պեկինեսը չի հակաճառում իր տերերին կամ մյուս շներին։ Նա շատ քաղաքավարի շնիկ է, պարզապես նա բառի բուն իմաստով չափազանց երկար լեզու ունի։ 11,5 սանտիմետրանոց լեզուն խանգարում է Փագիին իր առօրյայում։ Նա չի կարողանում լավ ծամել մթերքները։ Այդ պատճառով նրա տերերն ստիպված են լինում մանր-մանր կտրատել մթերքը նրա համար։ Չնայած սրան՝ Փագին իր կյանքի սկզբում թափառական շուն է եղել, իսկ այժմ այս ընկերասեր շունը միջազգային աստղ է դարձել իր ռեկորդի շնորհիվ։
