1in.am-ը գրում է.
Գերմանիայում քրդերի ցույցերը, որոնք անցկացվել են ի նշան ԴԱԻՇ-ի կողմից հարձակման ենթարկվող սիրիական Քոբանի քաղաքում գտնվող հայրենակիցներին աջակցության, վերածվել են ոստիկանության հետ բախումների:
Անցած գիշեր անկարգություններ են ծայր առել Համբուրգում:
Ինչպես հայտնել են Գերմանիայի իրավապահ մարմիններում, չորեքշաբթի երեկոյան քաղաքում խաղաղ ցույց է անցկացվել, որին մասնակցել է մոտ 1300 մարդ: Մասնակիցները միջազգային հանրությանը կոչ են արել ավելի ակտիվ միջոցառումներ ձեռնարկել ԴԱԻՇ-ի դեմ պայքարում: Ցուցարարները պահանջել են նաև բանտից ազատել Քրդական աշխատավորական կուսակցության առաջնորդ Աբդուլլա Օջալանին, որը ցմահ ազատազրկման պատիժ է կրում:
Ցույցի պաշտոնական ավարտից հետո քրդերի խմբերն ուղևորվել են Սուրբ Գեորգի շրջան, որտեղ սկսել են քարեր ու շշեր նետել ոստիկանների ուղղությամբ: Տուժել է առնվազն 1 մարդ: Երկաթուղային կայարանի շրջանում ցուցարարները հարձակվել են առևտրի կետերի վրա:
Մի քանի մարդ կալանավորվել է: Ոստիկանությունը ագրեսիվորեն տրամադրված ցուցարարներից դանակներ ու բեյսբոլի մահակներ է առգրավել: