Այսօր պարզեցի, որ այս տարի սեպտեմբերի մեկը շաբաթ օր է ընկնում: Շնորհավորում եմ մեր բոլոր դպրոցականներին: Դա աննկարագրելի երջանկություն է երեխաների համար :Երբ դպրոցական էի, մի անգամ այդպիսի նվեր ստացել եմ օրացույցից:
Ինչ մեղքս թաքցնեմ, մի քանի անգամ դպրոցական տարիներին մեծ երջանկություն եմ ապրել: Ուրախացել էինք, երբ երկրորդ դասարանում ձմռանը տղերքով դասարանի ջեռուցման խողովակները ծակել էինք ու վթարի պատճառով մեզ ազատ էին արձակել : Երջանիկ էինք, երբ դասատուները հիվանդանում էին: Սպասում էինք երկար դասամիջոցին, որ աղջիկների հետ բռնոցի-գզոցի խաղաինք:
Ու իհարկե, ուրախությունս անսահման էր, երբ դպրոցը ավարտեցի:Դասարանցիներս գնացին վերջին զանգի խնջույքին ՛՛10 Բ՛՛ գոռալու, իսկ ես բակիս ընկերների հետ իջա Հրազդանի ձոր, մի լավ լողացանք, ու ծխեցինք… Արդեն մեծ էինք:
