Սեպտեմբերի 20-ին լրացավ համաշխարհային կինոմատոգրաֆիայի լեգենդ Սոֆի Լորենի 80 ամյակը` պատկառելի հասակ, բայց սեքս-սիմվոլ համարվող դերասանուհու կերպարին ոչ այդքան բնորոշ: Նրա հայացքում ամփոփված են կենսատու էներգիան, կենդանի միտքը, կանացի փայլն ու գեղեցկությունը: Ժամանակն ասես նրա կողքով է անցել:
Կարիերայի սկզբում Սոֆի Լորենին առաջարկեցին նիհարել և պլաստիկ վիրահատության միջոցով ձևափոխել քթի կառուցվածքը: Նա հրաժարվեց, ասելով, որ չի ցանկանում հետևել արհեստական գեղցկության ստանդարտներին: Իր գեղեցկության գաղտնիքը նա բացահայտել է տարբեր հարցազրույցներում և իր հեղինակած «Կանայք և գեղեցկությունը» գրքում:
Բացահայտենք Սոֆի Լորենի գեղեցկության գաղտնիքները…
1. Կանոնավոր խնամք
«Եթե երիտասարդ կինը գեղեցիկ է, սակայն կանոնավոր կերպով չի խնամում իրեն, ժամանակի ընթացքում կորցնում է գեղեցկությունը: Իսկ եթե ամենահասարակ կինը կանոնավոր կերպով հետևում է իր խնամքին, տարիների ընթացքում էլ ավելի է գեղեցկանում»,- գրում է Սոֆին: Նրա այն միտքը, թե «Դժվար է լինել անկրկնելի, եթե ալարկետ ես», վաղուց թևավոր է դարձել:
Եվ այսպես, կանացի գրավչության գլխավոր գաղտնիքներից մեկը հանդիսանում է ինքնակարգավորումը:
Որպես որակյալ կոսմետիկ միջոց, դերասանուհին օգտագործում է ձիթապտղի յուղ: Այն օգտագործվում է որպես կրեմ ողջ մարմնի համար, մազերի ամրացման և խոնավեցման, դիմահարդարումն իջեցնող միջոց: Նաև դրանով ընդունում է լոգանքներ: Սոֆին ասում է, որ բնատուր օժտված է լավ մաշկով, սակայն հենց ձիթապտղի յուղն է օգնել իրեն պահպանել երիտասարդությունը:
Ամեն առավոտ դերասանուհին դեմքը շփում է վարդաջրով և աչքերի շուրջ քսում խոնավեցնող կրեմ: Մազերի ամրացման համար դիմակներիների փոխարեն հաճախ օգտագործում է ձիթապտղի յուղ և լոգանք ընդունում մանակական շամպունով:
Դերասանուհին համարում է, որ տարիների ընթացքում պետք է կրճատել կոսմետիկ միջոցների օգտագործումը: «Մեծանալուն համընթաց, պետք է ավելի քիչ կոսմետիկ միջոցներ օգտագործել: Սա պարզ կանոն է: Միշտ նկատելի է, որ տարեց կանայք փորձում են տարիքը կոծկել դիմափոշու հաստ շերտով, սակայն դա նրանց ամենևին էլ գրավիչ չի դարձնում»:
2. Ճիշտ սնուցում
Հետաքրքիր է, որ դերասանուհու սիրելի ուտեստներից մեկը ձիթապտղի յուղով և բնական տոմատի սոուսով մակարոնն է: Նա չի հետևում ոչ մի դիետայի և շատ է սիրում ուտել: Կարևորը ճիշտ սնվելն է: Պետք է ուտել փոքր չափաբաժնով և հետևել նրան, թե ինչ եք ուտում: «Ճիշտ սննդակարգից է կախված ոչ միայն գեղեցիկ կազմվածքը, այլև դեմքը, ինքնազգացողությունը և տրամադրությունը»: Դերասանուհու սննդակարգում ներառված են սովորական բնական կերակուրներ: Ուտում է լոբի, բրինձ և բանջարեղեն: Լորենը խորհուրդ է տալիս չօգտագործել պահածոյացված մթերքներ, քչացնել կարմիր մսի օգտագործումը և ավելի շատ ուտել ձկնեղեն և տապակած ճուտ: Սպիտակ մսի և ձկան մեջ ճարպի քանակությունը շատ ավելի քիչ է և սպիտակուցի պարունակությունը նույնքան է, որքան սովորական մսի մեջ:
Լորենի խոսքով, պետք է նաև շատ հեղուկներ օգտագործել: «Եթե խմում եք բավարար քանակությամբ ջուր` օրական 8 բաժակ, ապա դա օգնում է ձեր մաշկին մնալ երիտասարդ և թարմ: Պարտադիր չէ խմել սովորական ջուր: Դա կարող է լինել նաև հանքային ջուր, մրգային հյութեր, սուրճ կամ թեյ: Սակայն, իհարկե, պետք չէ մեկ օրում խմել 8 բաժակ սուրճ»:
3. Ֆիզիկական վարժություններ
Ողջ կյանքի ընթացքում Սոֆի Լորենին հաջողվում է լինել բարեկազմ և նրբիրան: Դա հաջողվում է ոչ միայն ճիշտ սննդակարգի, այլ նաև ֆիզիկական վարժությունների միջոցով:
Դերասանուհին ասում է. «Ֆիզիկական վարժություններն օգնում են փայլուն տեսք ունենալ: Եթե զբաղվում եք մարմնամարզությամբ, ապա քայլեք ճիշտ և հպարտ` ասես աշխարհը ձեր ձեռքերում է»: Լորենի խոսքով` նա արթնանում է շատ վաղ` առավոտյան ժամը 5-6-ը: Այնուհետև կատարում է ամենօրյա մարզանքը` ներառյալ ձգումները: «Ես միշտ շուտ եմ արթնանում և դուրս վազում անկողնուց, նույնիսկ եթե դա չեմ ցանկանում: Պետք չէ պատճառներ փնտրել չմարզվելու համար: Ես նաև շատ եմ քայլում: Օրվա մեջ մեկ ժամյա զբոսանքը օգտակար է սրտի աշխատանքին և բարեկազմ արտաքինին»:
Իտալացի հայտնության խոսքերով, անկողնում արված ձգումները օգնում են արյան շրջանառությանը և վերադարձնում են վարդագույն դեմքը, բայց գլխավորը` դարձնում են մարմինն ավելի ճկուն: Ձգումների ժամանակ Լորենը հատուկ ուշադրություն է դարձնում շնչառությանը: Եթե շնչես խորը և հավասարաչափ, թթվածինը թափանցում է թոքեր և մաքրում արյունը: Պետք է ներշնչման ժամանակ փորն ամբողջությամբ օդով լցնել: Այնուհետև ծավալն աստիճանաբար փոքրացնել, մինչև վերջնական արտաշնչումը: Արտաշնչելու ժամանակ օրգանիզմից հեռանում է կուտակված ողջ ավելորդ օդը:
Դերասանուհին վստահեցնում է, որ այդ ձգումների 10-15 րոպեների կատարումը նրա մոտ լավ տրամադրություն է առաջացնում:
4. Հարազատների սերը
Չնայած երկրպագուների հոծ բազմությանը, Սոֆի Լորենն իր ողջ կյանքում սիրել է միայն մեկ տղամարդու` իր ամուսնուն` ռեժիսոր Կարլո Պոնտիին: Նրանց համատեղ կյանքը տևել է մոտ 50 տարի: Պոնտին մահացել է 2007թ.-ին`իրենց ոսկե հարսանիքից օրեր առաջ: «Մեր սերը Աստծո պարգև է, որին շատ քչերն են արժանանում»,- ասել է Սոֆի Լորենը ամուսնու հուղարկավորության ժամանակ: Զույգն ունեցել է երկու երեխա` Կարլո Պոնտի կրտսերը և Էդուարդո Պոնտին: Դերասանուհին սիրում է իր ժամանակի զգալի մասը նրանց հետ անցկացնել:
Սոֆին չի պատկերացնում իր կյանքն առանց սիրելի աշխատաանքի. «Ինձ թվում է ես պարզապես այս աշխատանքի համար եմ ծնված: Երբ նկարահանումների միջև դադարը երկար էր տևում, ես բառացիորեն իմ տեղը չէի գտնում և տրամադրությունս կտրուկ անկում էր ապրում»:
5. Դրական մտածողություն
Լորենն ասում է, որ դեմքը հոգու հայելին է և արտացոլում է մարդու բնավորությունը: «Պատանու կամ աղջնակի դեմքին քիչ բան կկարդաս` միայն պտանեկության պարգևած պարզությունը: Բայց ժամանակն առաջ է ընթանում. մենք ինքներս ենք պատասխանատու ոչ միայն մեր մաշկի խնամքի, այլև արտաքինի համար: Ամեն ինչն է տեսանելի` ձանձրույթը, զայրույթը, վատ տրամադրությունը, բողոքները: Տարիներն անցնում են, իսկ վերջիններիս հետքերը` դառնում անջնջելի: Սակայն հումորը, բարյացկամությունը և հանդուրժողականությունը ևս ձևավորում են մեր դեմքը և ստեղծում ժամանակի ազդեցությանը չենթարկվող կերպար:
Դերասանուհին խոստովանում է, որ երբ զբոսնում է այգիներում, ամեն պահ մտածում է` տեսնես ինչ կա այնտեղ` անկյունում: Պետք է, որ անպայման որևիցե գեղեցիկ բան լինի:
«Ես միշտ եմ դրական մտածում: Շատ հազվադեպ է լինում, երբ տխուր եմ լինում կամ մելանխոլիկ տրամադրության մեջ: Վայելեք կյանքի ամեն մի ակնթարթը: Շրջապատեք ձեզ սիրելի մարդկանցով, ում հետ հաճելի է զրուցել, հետաքրքիր նորություններ փոխանակել»:
6. Ինքնաճանաչողություն և տարիքի ճիշտ ընկալում
«Տարիքը սկսվում և ավարտվում է մտածողությամբ»-նշում է Սոֆի Լորենը և ավելացնում, որ ոչ մի տեսակի գեղեցկություն չի կարող համեմատվել ինքնաճանաչման գեղեցկության և բավարարվածության հետ: Դա կարող է լինել այն դեպքում, երբ դուք ընդունում եք ձեզ այնպիսին, ինչպիսին կաք իրականում»: Դերասանուհին սիրում է անընդհատ կրկնել իր կյանքի սկզբունքը. «Թող որ կյանքն ընթանա իր հունով»: Նա խորհուրդ է տալիս չծանրաբեռնել ինքներդ ձեզ չափազանց շատ գործերով ու պատասխանատվությամբ, չչարչարվել ամեն ինչ հասցնելու և ամեն ինչ տեսնելու համար: Մեկ է դա անհնար է, և միաժամանակ, ուժերի նման լարումը ձեզ երջանկություն չի բերի: «Իհարկե, գոյություն ունի «երիտասարդության շատրվանը»: Դա խելքն է, տաղանդը, ստեղծագործ միտքը, որը կարող եք բերել ձեզ և ձեզ շրջապատող սիրելի մարդկանց կյանք: Երբ ընդունեք ձեզ այնպիսին, ինչպիսին որ կաք, համարեք, որ դուք իսկապես հաղթել եք տարիքին»,- ասել է իտալուհի կինոաստղը:
