1in.am-ը գրում է.
Միացյալ Նահանգները «բացարձակ անընդունելի և բացարձակ անարդարացի» է համարել Իսրայելի կողմից Գազայի հատվածում ՄԱԿ-ի փախստականների գնդակոծումները, տեղեկացնում է BBC-ի ռուսական ծառայությունը։
Պենտագոնի ներկայացուցիչը հայտարարել է, թե Գազայում զոհված խաղաղ բնակիչների թիվը անչափ մեծ է, և կոչ է արել Իսրայելին միջոցներ ձեռնարկել սեկտորի խաղաղ բնակչության պաշտպանության համար։
ՄԱԿ-ը նաև քննադատության է ենթարկել Իսրայելի գործողությունները Գազայում, հայտարարելով, թե պաղեստինցի փախստականները գտնվում են աղետալի պայմաններում և կանգնած են անդունդի եզրին։
ՄԱԿ-ի տեղեկությամբ, Իսրայելի կողմից Գազայի հատվածում անցկացվող ռազմական գործողության պատճառով իրենց տները ստիպված են եղել լքել 425 հազար պաղեստինցիներ։
Սեկտորի իշխանությունների տվյալներով այնտեղ զոհվել է մոտավորապես 1400 պաղեստինցի, հիմնականում՝ քաղաքացիական անձինք։ Սպանվածների թիվը միայն վերջին օրերին կազմել է 173 մարդ։
Իսրայելի կողմից սպանվել է 56 զինծառայող և երկու խաղաղ բնակիչ։
Իսրայելը հայտարարում է, թե մտադիր չէ դադարեցնել ռազմական գործողություններն այնքան ժամանակ, քանի դեռ չի ոչնչացրել բոլոր թունելները, որոնք օգտագործում են ՀԱՄԱՍ-ի գրոհայինները իսրայելական տարածք ներթափանցելու համար։