Life.panorama.am-ը գրում է.
Բեմադրիչ Սուրեն Շահվերդյանն այն կարծիքին է, որ այսօր խաղացանկային թատրոններում մեծ մասամբ անհետաքրքիր, ոչ արդիական, ժամանակավրեպ ներկայացումներ են: Life.panorama.am-ի հետ զրույցում նա անդրադարձել է իր բեմադրած վերջին ներկայացմանը, խոսել է հայ թատրոնի ներկայիս խնդիրներից, երկրում առկա իրեն հուզող հարցերից: Չենք շրջանցել նաև «Չէին սպասում» հաղորդման շրջանակներում սուր հարցադրումներով հանդես եկող հաղորդավար Սուրենի կերպարը:
-Դուք դեռ համարվում եք ազատ ստեղծագործո՞ղ, թե՞ հիմնավորվել եք որևէ թատրոնում:
-Սունդուկյանի անվան թատրոնից հեռանալուց հետո ոչ մի թատրոնում չեմ հիմնավորվել:
-Այժմ Դրամատիկական թատրոնում հանդիսատեսը կարող է դիտել ձեր բեմադրած ներկայացումը՝ «Սև, դառը շոկոլադը»: Այստեղ ներկայացվում է կին-տղամարդ հարաբերությունը և մտորելու առիթ է տրվում՝ ի վերջո, նրանցից ով է ճիշտ: Իսկ ո՞րն է հարցի շուրջ ձեր տեսակետը:
-Մինչ օրս իմ բեմադրած բոլոր ներկայացումները կնոջ, նրա ցավի մասին են: Պիեսի հեղինակի՝ Էմմա Պետրոսյանի հետ համաձայն եմ. այնուամենայնիվ, ինքս էլ մի փոքր ավելի կնոջ կողմն եմ: Կարծում եմ, հատկապես՝ մեր տարածաշրջանում, կանայք լուրջ խնդիրներ ունեն: Մենք դեռ կիսամահմեդական մի երկիր ենք, որտեղ տղամարդը համարում է, որ ինքն է աստվածը: Կնոջ հանդեպ վերաբերմունքը, մեղմ ասած, ոչ նրբանկատ է:
-Կա՞ միջազգային մի փառատոն, որին պատրաստվում եք առաջիկայում մասնակցել:
-Ոչ, այդպիսի փառատոն չկա: «Սև, դառը շոկոլադով» պետք է հանդես գանք ԱՄՆ-ում, բանակցություններ կան նաև, որ այն ներկայացվի Ֆրանսիայում: Այնպես որ, աշնանը զբաղվելու եմ այս ներկայացման ճակատագրով, այն հանձնելու ենք արտերկրի մեր հանդիսատեսի դատին:
-Այսօրվա թատրոնների աշխատանքը կողքից նայելով՝ ի՞նչ բացթողումներ եք տեսնում:
-Խաղացանկային թատրոններում մեծ մասամբ անհետաքրքիր, ոչ արդիական, ժամանակավրեպ ներկայացումներ են: Մեր հասարակությունում կատարվում են բաներ, որոնք հրատապ են, իսկ այսօր որոշ թատրոններ սովետական թեմաներով պիեսներ են բեմադրում և դրա համար ֆինանսավորվում են պետության կողմից: Յուրաքանչյուր ներկայացում վերաբաշվում է մի քանի հոգու մեջ և վերջիններս տարիներ շարունակ նույն անհեթեթությունը մատուցում են հանդիսատեսին: Նաև այդ է պատճառը, որ թատրոններն այսօր հանդիսատեսի պակաս ունեն:
-Բայց այսօր դերասանները, ռեժիսորները ամենուրեք պնդում են, որ Հայաստանում թատրոնները հանդիսատեսի պակաս շատ չունեն, և այդ խնդիրը այնքան սուր չէ, որքան ներկայացվում է:
-Հանդիսատեսի պակաս չունի Կամերային թատրոնը, Դրամատիկականը, որտեղ բեմադրվում են լավ ներկայացումներ, բայց մյուս թատրոնները տոմս վաճառելու խնդիր ունեն:
Ամբողջական հոդվածը կարող եք կարդալ այստեղ