Panorama.am-ը գրում է.
20-րդ դարի հայ ականավոր նկարիչ-քանդակագործ Երվանդ Քոչարի ծննդյան 115-ամյակի առիթով Քոչարի թանգարանը հունիսի 15-ին «Սասունցի Դավիթ» արձանի մոտ կազմակերպելու է տոնախմբություն: Այս մասին Panorama.am-ի հետ զրույցում տեղեկացրեցին Ե. Քոչարի թանգարանից:
Առավոտյան նախ այցելություն է կազմակերպվելու Ե. Քոչարի շիրիմին, իսկ երեկոյան «Սասունցի Դավիթ» արձանի մոտ նախատեսված տոնախմբությանը ելույթ է ունենալու «Կարին» ազգագրական պարային համույթը:
«Ո՜չ, ո՜չ և հազար անգամ ո՜չ, Երվանդ Քոչարին չի կարելի սովորական նկարիչ համարել, հանրածանոթ բնութագրումներն ու մակդիրներն այս դեպքում անիմաստ են: Ինչպես բնորոշել նրան՝ հզո՞ր, թե՞ հանճարեղ. այս երկու գնահատականների միջև թերևս կարելի է տատանվել, չնայած ես հակված եմ երկրորդին...»,- Երվանդ Քոչարի մասին ասել է ֆրանսիացի արվեստի պատմաբան Անդրե Պասկալ Լևիսը:
ՀԽՍՀ և ԽՍՀՄ ժողովրդական նկարիչ Երվանդ Քոչարը հայ քանդակագործության և գեղանկարչության ամենանշանավոր ներկայացուցիչներից է, եռաչափ (ծավալային) և կինետիկ գեղանկարչության հիմնադիրներից, մոմաներկերի գյուտի հեղինակը:
«Քոչարի տարածական նկարչությունն արդի արվեստի նվաճումներից է, նշանակալի այնքան, որքան Բրանկուզիի անեղծ ձևերը, Պիկասսոյի և Բրաքի կառուցվածքները... Տարածական նկարչութունը խարխլեց արձանագործության և հարթանկարչության շրջանակը: Այն բարեփոխեց տեսողական օրենքները՝ մի երրորդ ուղի բացելով նկարիչների ու քանդակագործների առջև: Եկել է ժամանակը հատուցելու Քոչար արարչագործի պատվո վճարը, որին նա արժանի է իրավամբ»,- ասել է ֆրանսիացի արվեստաբան Վալդեմար Ժորժը:
Ամբողջական հոդվածը կարող եք կարդալ այստեղ